Чет тилидан малакавий имтиҳон масофавий тарзда ўтказилди

Ўзбекистон Республикаси Вазирлар Маҳкамаси ҳузуридаги Олий аттестация комиссиясининг тавсиясига биноан, коронавирус пандемияси тарқалишининг олдини олиш, изланувчилар ва мутахассислар соғлигини асраш ва аттестация жараёнини самарали ташкил қилиш мақсадида 2020 йилнинг 28 май куни Бош прокуратура Академияси мустақил изланувчилари чет тили бўйича малакавий имтиҳонни онлайн режимида топширдилар.

Имтиҳон мамлакатимизнинг кўзга кўринган тилшунос ва ҳуқуқшунос олимларидан иборат таркибда тузилган ва Олий аттестация комиссияси томонидан тасдиқланган ҳайъат таркибида олиб борилди.

Имтиҳонда мустақил изланувчилар билан мамлакатимизда суд-ҳуқуқ соҳасида амалга оширилаётган ислоҳотлар, ихтисослик бўйича мавжуд илмий тадқиқотлар ва улардаги замонавий йўналишлар, тадқиқ этилаётган мавзу доирасида мавжуд илмий муаммолар ва уларнинг ечими юзасидан инглиз тилида суҳбат ўтказилди.

Онлайн режимида малакавий имтиҳонни муваффақиятли топширган мустақил изланувчиларга гувоҳномалар электрон шаклда етказилиши, уларнинг асл нусхалари эса талаб қилиб олингунига қадар Бош прокуратура Академиясида сақланиши таъминланади.