Наманган вилоят прокуратураси ходимлари учун ташкиллаштирилган махсус малака ошириш курси якунланди

Бош прокуратура Академияси томонидан Наманган вилоят прокуратурасининг судларда прокурор ваколатини таъминлаш йўналишида хизмат қилаётган ходимлар учун жорий йилнинг 2 мартидан 30 май кунига қадар ташкиллаштирилган масофавий махсус малака ошириш ўқув курси якунланди.

Малака ошириш ўқув курси вилоят прокуратураси ходимларига асосий иш жойидан ажралмаган ҳолда ўз устида ишлаш, билим савияларини янада ошириш имконини берди.

Ўқиш давомида ходимлар томонидан жиноят, фуқаролик, иқтисодий ва маъмурий суд йўналишларидаги билимларини янада мустаҳкамлашга қаратилган мавзулар, тегишли манбалар ўрганилиб борилиб, тест, муаммоли вазиятлар ҳамда казуслар кўринишдаги оралиқ синовлар ўтказилди.

Ўқув машғулотларида мамлакатда амалга оширилаётган суд-ҳуқуқ ислоҳотлари, Ўзбекистон Республикасининг жиноят ва жиноят-процессуал, фуқаролик ва фуқаролик процессуал, иқтисодий процессуал, шунингдек маъмурий суд ишларини юритиш тўғрисидаги кодекслари ҳамда Маъмурий жавобгарлик тўғрисидаги кодекси нормаларини тўғри қўллаш, судлов соҳаларида муайян тоифадаги ишларни кўрилишида ягона суд амалиётини таъминлаш масалалари, амалдаги қонунчиликка киритилган янгиликлар масалаларига алоҳида аҳамият берилди.

Масофавий таълим тарзидаги малака ошириш ўқув курслари якуни бўйича online режимида имтиҳон ўтказилди.

Имтиҳон якунлари бўйича ходимларга белгиланган тартибдаги сертификатлар топширилди.