Прокуратура органлари ходимлари малакасини ошириш масофавий курси дастлабки гуруҳининг ўқув жараёнлари якунланди

Бош прокуратура Академияси томонидан республика прокуратура органларининг судларда прокурор ваколатини таъминлаш йўналишида хизмат қилаётган тезкор ходимлари учун ташкил этилган махсус масофавий малака ошириш ўқув курсининг дастлабки гуруҳи учун ўқув жараёни якунланди.

Давомийлиги 144 соат бўлган мазкур масофавий курс ўқув машғулотлари жорий йилнинг 2 мартидан 6 июнь кунига қадар таълимнинг “4+0” тизими асосида масофавий тарзда ўтказилиб, тингловчилар учун асосий иш жойидан ажралмаган ҳолда ўз устида ишлаш, билим ва савияларини янада ошириш имкониятини берди.

Ўқув курси давомида ходимлар томонидан прокуратура фаолиятининг умумий масалалари, шунингдек фуқаролик, жиноят ишлари бўйича судларда, иқтисодий ва маъмурий судларда прокурор ваколатини таъминлаш йўналишларидаги назарий билим ва кўникмаларини мустаҳкамлашга қаратилган мавзулар, тегишли манбалар ўзлаштириб борилиб, тестлар,  муаммоли вазиятлар ва казуслар ечимида иштирок этилди.

Масофавий малака ошириш курсининг якунида online тарзидаги имтиҳон ўтказилиб, унда ходимларнинг Ўзбекистон Республикасининг фуқаролик ва фуқаролик процессуал, жиноят ва жиноят-процессуал, иқтисодий процессуал, маъмурий суд ишларини юритиш тўғрисидаги кодекслари ҳамда Ўзбекистон Республикасининг Маъмурий жавобгарлик тўғрисидаги кодекси нормаларини тўғри қўллаш, мамлакатимизда амалга оширилаётган суд-ҳуқуқ ислоҳотлари, амалдаги қонунчиликка киритилган янгиликлар ҳамда уларни амалиётда қўллаш масалалари бўйича билимлари синовдан ўтказилди.

Имтиҳон якунлари бўйича ходимларга белгиланган тартибдаги сертификатлар топширилди.