Бош прокуратура Академияси ва USAID ҳамкорлиги давом этмоқда

Бош прокуратура Академияси ва АҚШнинг Халқаро Тараққиёт Агентлиги (USAID)нинг Ўзбекистондаги суд-ҳуқуқ ислоҳотлари дастури билан самарали ҳамкорлик йўлга қўйилган бўлиб, унинг доирасида ўқув жараёнларига чет эллик юқори малакали мутаxассислар жалб қилиб келинмоқда.

Жумладан, Вашингтон университети юридик инглиз тили дастурининг етакчи ўқитувчиси, ушбу соҳада кўп йиллик тажрибага эга бўлган мутахассис Патрисия Маклафлин билан ўқув дастурлари ишлаб чиқиш бўйича ишлар олиб борилмоқда.  

Жорий йилнинг 11 июнида Академиянинг Тил ўргатиш кафедраси профессор-ўқитувчилари ҳамда П.Маклафлин иштирокида онлайн давра суҳбати ташкил этилиб, суҳбат давомида юридик инглиз тили дастурини келгусида амалга ошириш, ўқув материалларини, шу жумладан масофавий таълимни амалга ошириш доирасида электрон шаклдаги ўқув контентини такомиллаштириш масалалари муҳокама қилинди.

Давра суҳбати якунида прокуратура ходимлари учун юридик инглиз тилини ўқитиш бўйича маxсус ўқув қўлланма тайёрлаш ва нашр этиш билан боғлиқ лойиҳани амалга оширишга қаратилган ҳамкорликдаги лойиҳа келишиб олинди. Келгусида самарали ҳамкорликни давом эттириш мақсадида масофавий ишни ташкил этиш масалалари муҳокама қилиб олинди.