Нельсон Мандела Халқаро кунига бағишланган давра суҳбати ўтказилди

Нельсон Мандела Халқаро кунини нишонлаш арафасида Ўзбекистон Республикаси Бош прокуратураси Академияси томонидан Бирлашган Миллатлар Ташкилотининг Наркотик моддалар ва жиноятчилик бўйича бошқармаси билан ҳамкорликда жорий йилнинг 17 июль куни “Ўзбекистон Республикасида жиноят-ижроия қонунчилигини такомиллаштириш истиқболлари” мавзусида онлайн давра суҳбати ўтказилди.

Тадбирда Ўзбекистон Республикаси Инсон ҳуқуқлари бўйича Миллий маркази, Омбдусман, ЖИЭМ, Пробация хизмати раҳбарияти ва вакиллари, шунингдек бошқа вазирлик ва идоралар, илмий ва таълим муассасаларининг вакиллари ҳамда жиноят-ижроия қонунчилиги соҳасидаги Латвия, Қозиғистон ва Қирғизистондан хорижий экспертлар иштирок этдилар.

Тадбирни кириш сўзи билан очган Бирлашган Миллатлар Ташкилотининг Наркотик моддалар ва жиноятчилик бўйича бошқармасининг ҳудудий вакили Ашита Миттал ҳамда АҚШ элчихонаси ишлари бўйича вақтинчалик ишончли вакил Алан Мельцерлар томонидан Ўзбекистонда инсон ҳуқуқлари соҳасидаги халқаро мажбуриятларни бажаришдаги изчиллик, шунингдек инсон ҳуқуқларини ҳимоя қилиш тизимини такомиллаштириш борасида мамлакатимизда амалга оширилаётган ислоҳотлар аҳамияти таъкидлаб ўтилди.      

Давра суҳбати давомида БМТнинг Маҳкумлар билан муносабатда бўлишнинг минимал стандартлари – “Нельсон Мандела қоидалари”ни татбиқ қилиш, жазони ижро этиш тизимини ислоҳ қилиш ҳамда қонунчиликни халқаро стандартлар ва илғор хорижий тажрибаларни инобатга олган ривожлантириш борасида комплекс чора-тадбирларни амалга ошириш, шунингдек пробация хизматининг маҳкумларнинг ижтимоий мослашувига кўмаклашишга доир фаолият самарадорлигини ошириш масалалари кўриб чиқилди.

Шунингдек, иштирокчилар маҳкумларнинг ҳуқуқ ва эркинликлари ҳамда қонуний манфаатларининг ҳимоясини таъминлаш ва COVID-19 пандемияси даврида маҳкумлар билан муносабатда бўлиш каби долзарб масалаларни муҳокама қилдилар.

Шу билан бирга, тадбир давомида Бирлашган Миллатлар Ташкилотининг Наркотик моддалар ва жиноятчилик бўйича бошқармаси экспертлари томонидан БМТнинг Маҳкумлар билан муносабатда бўлишнинг минимал стандартлари – Нельсон Мандела қоидаларига бағишланган онлайн ўқув курсининг тақдимоти бўлиб ўтди ҳамда ушбу ўқув курси келгусида тингловчиларни онлайн ўқитиш учун Академия ахборот-таълим порталида жойлаштирилиши таъкидланди.