Бош прокуратура Академияси магистратурасида давлат имтиҳонлари ўтказилмоқда

Ўзбекистон Республикаси Бош прокуратураси Академиясида “Прокурорлик фаолияти”, “Тергов фаолияти” ва “Коррупцияга қарши курашиш” йўналишлари бўйича магистрантларнинг якуний давлат аттестацияси ўтказилмоқда.

Давлат якуний аттестацияси магистратура таълим дастурининг мажбурий қисми ҳисобланиб, мутахассислик бўйича якуний давлат имтиҳонини топшириш ва масофавий шаклда магистрлик диссертациясини ҳимоя қилишдан иборат.

Якуний давлат имтиҳонлари 2020 йил 21 июлдан бошлаб онлайн режимда бошланиб, Академия ва бошқа таълим муассасаларининг профессор-ўқитувчилари, етакчи амалиётчилар, шунингдек кузатувчилар сифатида иштирок этаётган жамоатчилик вакилларидан иборат Давлат аттестация комиссияси томонидан ўтказилмоқда.

Якуний давлат имтиҳонларида масофадан туриб қатнашган тингловчи ва Давлат аттестация комиссияси аъзоларининг шахсини аниқлаш электрон таълим бўлими томонидан амалга оширилмоқда.

Якуний давлат имтиҳонларини ўтказишдан олдин ахборот-коммуникация технологияларидан фойдаланган ҳолда имтиҳонолди консультациялар ўтказилди.

Академия магистрантлари COVID-19 пандемияси шароитида Академия ахборот-ресурс марказининг электрон кутубхонаси билан интеграциялашган «ProАcademy» ахборот-таълим порталининг электрон манбаларидан фойдаланган ҳолда давлат имтиҳонларига тайёргарлик борасида самарали ишлаш имконига эга бўлдилар.

Академия порталининг тўлиқ ишлаши якуний имтиҳонларни замонавий таълим стандартлари даражасида ва академик ҳалоллик принципларига мувофиқ равишда ташкил этиш ва ўтказиш учун асос бўлиб хизмат қилди.

Оғзаки шаклда ўтказилаётган давлат имтиҳонлари натижалари имтиҳон куни тингловчиларга эълон қилинади.

Жараённинг шаффофлигини таъминлаш мақсадида барча давлат аттестация имтиҳонлари видеоёзувга олинмоқда.