ARIN-WCA тармоғи Бошқарув гуруҳи аъзоларининг навбатдаги йиғилиши ўтказилди

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) Котибияти вазифасини амалга ошириши доирасида мазкур тармоқ Бошқарув гуруҳи аъзоларининг навбатдаги йиғилишини ташкиллаштирди.

Йиғилиш видеоконференцалоқа воситасида ўтказилиб, унда Бошқарув гуруҳи аъзолари (Қозоғистон, Қирғизистон, Покистон ва Ўзбекистон), БМТ Гиёҳвандлик ва жиноятчилик бўйича бошқармаси (UNODC) вакили Данило Камписи ҳамда халқаро экспертлар Джилл Томас ва Фредерик Раффрей иштирок этишди.

Мазкур йиғилишда жорий йилнинг ноябрь ойида ўтказилиши режалаштирилган тармоқнинг йиллик умумий йиғилиши кун тартиби лойиҳаси, шунингдек уни ўтказиш билан боғлиқ муҳим ташкилий масалалар иштирокчилар ва экспертлар томонидан муҳокама қилиниб, зарурий чора-тадбирлар белгиланди.

Шунингдек, ARIN-WCA Котибияти сифатида Бош прокуратура Академияси Бошқарув гуруҳи аъзоларини тармоқ фаолиятини бошқариш доирасида амалга оширилган ишлар ва келгусидаги режалар тўғрисида хабардор қилди.

Хусусан, Котибият томонидан бугунги кунда UNODC билан ҳамкорликда тармоқ вебсайтини такомиллаштириш ишлари олиб борилаётганлиги, халқаро экспертлар иштирокида “Активларни бошқариш” ва “Активларнинг бенефициар эгаларини аниқлаш” мавзуларида ўқув модуллари ишлаб чиқилаётганлиги, ушбу мавзулар доирасида ARIN-WCAга аъзо давлатлар ваколатли органлар ходимлари учун онлайн тренинглар ўтказилиши, активларни қайтариш соҳасида ҳамкорликни кенгайтириш мақсадида қатор хорижий давлатлар ва бошқа ARIN тармоқларига тегишли сўровномалар юборилганлиги, Европа ва Осиё давлатлари ваколатли органлари вакилларининг тармоқнинг йиллик умумий йиғилишида иштирок этиши юзасидан музокаралар олиб борилаётганлиги маълум қилинди.

Йиғилиш якунларига кўра Бошқарув гуруҳи аъзолари томонидан ARIN-WCA фаолиятини такомиллаштириш бўйича амалга оширилиши керак бўлган муҳим вазифа ва тадбирлар белгилаб олинди.