А.Авлоний номидаги халқ таълими муаммоларини ўрганиш ва истиқболларини белгилаш илмий-тадқиқот институти билан Меморандум имзоланди

2020 йил 24 ноябрь куни Бош прокуратура Академиясида Халқ таълими вазирлигининг А.Авлоний номидаги халқ таълими муаммоларини ўрганиш ва истиқболларини белгилаш илмий-тадқиқот институти ҳамда Бош прокуратура Академияси ўртасида ҳамкорлик тўғрисидаги меморандум имзоланишига бағишланган тадбир бўлиб ўтди.
Меморандумни имзолаш маросимида Бош прокуратура Академияси бошлиғи Е.В.Коленко ҳамда А.Авлоний номидаги халқ таълими муаммоларини ўрганиш ва истиқболларини белгилаш илмий-тадқиқот институти ректори А.М.Раджиев, шунингдек муассасаларнинг масъул ходимлари иштирок этишди.
Тадбир давомида томонлар ўртасида бўлиб ўтган конструктив мулоқот давомида ҳамкорлик йўналишларини муҳокама қилиниб, қайта тайёрлаш ва малака ошириш жараёнини такомиллаштиришга қаратилган ўзаро манфаатли ва самарали ҳамкорлик қилишга тайёр эканликларини билдирдилар.
Томонлар андрагогик таълимнинг ўзига хос хусусиятларига кўра профессор-ўқитувчиларнинг педагогик маҳоратини ошириш, таълим жараёнига илғор педагогик ҳамда инновацион технологияларни жорий этиш ҳамда  жиноятчилик профилактикасига доир тадбирларда ва коррупцияга қарши кураш чоралари самарадорлигини оширишда ҳамкорлик қилишни белгилаб олишди.
Меморандумнинг имзоланиши икки томонлама ҳамкорликнинг янада ривожланишига хизмат қилади. Хусусан, унда институтнинг етакчи мутахассисларини Академиянинг илмий-тадқиқот ҳамда ўқув жараёнига жалб қилишни кенгайтириш имкониятлари, Академия профессор-ўқитувчилари томонидан халқ таълими тизими раҳбар кадрларининг ҳуқуқий саводхонлигини ошириш, ҳамкорликда ўқув материаллари, бошқа ўзаро манфаатли йўналишлар бўйича лойиҳаларни ишлаб чиқиш назарда тутилган.