Коррупцияга қарши курашиш масалаларига бағишланган глобал анжуман ўтказилди

Коррупцияга қарши курашиш агентлиги томонидан Бош прокуратура Академияси, Европада хавфсизлик ва ҳамкорлик ташкилотининг Ўзбекистондаги лойиҳалар координатори, БМТ Тараққиёт дастури, БМТнинг Гиёҳвандлик ва жиноятчилик бўйича бошқармаси ҳамкорлигида “Давлат ташкилотлари фаолиятида коррупцияни олдини олиш: муаммолар ва уларнинг ечимлари” мавзусидаги глобал анжуман ўтказилди.

Конференция 9 декабрь – Халқаро коррупцияга қарши курашиш куни муносабати билан ўтказилаётган коррупцияга қарши курашиш ҳафталиги туркум тадбирлари давоми бўлди.

Тадбирда Коррупцияга қарши курашиш бўйича миллий кенгаши раиси – Олий Мажлис Сенатининг Раиси Т.Нарбаева, Коррупцияга қарши курашиш агентлиги директори А.Бурханов, ЕХҲТ Ўзбекистондаги лойиҳалар координатори Дж.МакГрегор, БМТнинг Ўзбекистондаги доимий координатори Х.Фрейзер, БМТ Тараққиёт дастурининг Ўзбекистондаги доимий вакили М.Димовска ва БМТнинг ГЖББ Марказий Осиёдаги минтақавий вакили А.Миттал кириш сўзлари билан иштирок этдилар.

Бош прокуратура Академияси раҳбари “Илм-фан ва таълим орқали коррупциянинг олдини олиш” мавзусидаги маъруза билан сўзга қилиб, иштирокчиларга Академиянинг қайд этилган соҳадаги фаолияти бўйича маълумот берди ва коррупцияга қарши чора-тадбирлар самарадорлигини ошириш юзасидан аниқ таклифларни илгари сурди.

Конференцияда Ўзбекистондаги вазирлик ва идораларнинг раҳбарлари ва масъул ходимлари, халқаро ташкилотлар экспертлари, Украина, Қозоғистон, Малайзия ва Болгариянинг коррупцияга қарши курашувчи идораларининг раҳбарлари иштирок этди.

Хорижий экспертлар коррупцияга қарши курашиш тажрибалари, шунингдек амалиётда юзага келаётган муаммолар билан ўртоқлашиб, уларни бартараф этиш йўллари бўйича фикр алмашишди.

Тадбир якунида ҳалолликни таъминлаш чора-тадбирларини янада такомиллаштириш масалалари бўйича мунозара ўтказилиб, мазкур йўналишдаги тегишли тавсиялар ишлаб чиқилди.