Мустақил изланувчиларнинг илмий фаолияти мониторинг қилинди

Бош прокуратура Академиясида илмий изланиш олиб бораётган мустақил изланувчиларнинг фаолияти самарадорлигини баҳолаш бўйича йиллик мониторинг ўтказилди.

Мазкур тадбир Ўзбекистон Республикаси Президентининг 2017 йил 16 февралдаги “Олий ўқув юртидан кейинги таълим тизимини янада такомиллаштириш тўғрисида”ги ПФ–4958-сонли Фармони ҳамда Ўзбекистон Республикаси Вазирлар Маҳкамасининг 2017 йил 22 майдаги “Олий ўқув юртидан кейинги таълим тизимини янада такомиллаштириш тўғрисида”ги 304-сон қарорининг ижросини таъминлаш мақсадида ташкил этилди.

Мониторинг доирасида тадқиқотчиларнинг ўз иш режалари асосида ўтган йил давомида амалга оширган ишлари кўриб чиқилди. Жумладан, диссертация ишларининг бажарилиши, Олий аттестация комиссияси рўйхатига киритилган илмий журналлар ҳамда Scopus тизимининг даврий нашрларида чоп этилган мақолалар, диссертация натижаларининг амалиётга жорий этилиши билан боғлиқ ҳисоботлари тингланди ва тегишлича баҳоланди.

Тажрибали олимлар ва мутахассислардан иборат мониторинг комиссияси аъзолари томонидан тадқиқотчиларга диссертация ишини сифатли бажариш, шахсий режаларни самарали амалга ошириш юзасидан муҳим йўналишлар ва маслаҳатлар берилди.