Йўл ҳаракати хавфсизлиги бўйича халқаро ўқув курсида иштирок этилди

Ўзбекистон Республикаси Бош прокуратураси Академияси ҳамда Транспорт прокуратураси ходимлари Япония халқаро ҳамкорлик ташкилоти (JICA) томонидан Япониянинг Кобе шаҳрида жорий йилнинг 20 январидан 31 январига қадар “Йўл ҳаракати хавфсизлиги” мавзусида ташкиллаштирилган халқаро ўқув курсида иштирок этди.

Ўқув курси дастури доирасида Япониянинг йўл ҳаракати хавфсизлигини таъминлаш тизими, унинг шаклланиш тарихи, шунингдек мазкур соҳани ҳуқуқий тартибга солиш, йўл ҳаракати хавфсизлиги иштирокчиларини ўқитиш ва уларнинг малакасини ошириш, йўл ҳаракати хавфсизлигини таъминлаш бўйича бутун жараённи бошқариш масалалари ўрганилди.

Шу билан бир қаторда, иштирокчилар ўқув курси давомида семинарда иштирок этаётган Малайзия, Камбоджа, Тайланд ва бошқа давлатларнинг йўл ҳаракати хавфсизлиги соҳасида тажрибаларини ўрганиш асосида мамлакатимизда йўл ҳаракати хавфсизлигини таъминлаш амалиётига ижобий хорижий амалиётларни жорий этишга оид таклифлар ишлаб чиқиш имконига эга бўлдилар.

Маданий дастур доирасида Киото шаҳрига ташриф ташкил этилиб, иштирокчилар тарихий иншоотлар билан танишдилар ҳамда анъанавий чой маросимида иштирок этдилар.

Ўқув курси якуни бўйича иштирокчиларга сертификатлар берилди.