Академия профессор-ўқитувчиларининг педагогик маҳоратини ошириш бўйича тренинг ташкил этилди

Бош прокуратура Академияси томонидан етакчи хорижий ва миллий экспертларни жалб этган ҳолда профессор-ўқитувчиларнинг педагогик маҳоратини ошириб бориш бўйича тизимли ишлар амалга ошириб келинмоқда.

Профессор-ўқитувчилар учун навбатдаги тренинг А.Авлоний номидаги халқ таълими муаммоларини ўрганиш ва истиқболларини белгилаш илмий-тадқиқот институти билан имзоланган ҳамкорлик Меморандуми асосида “Таълим моделлари ва уларнинг амалда қўлланилиши” мавзусида ташкил этилди.

Тренинг А.Авлоний номидаги илмий-тадқиқот институти доценти, педагогика фанлари бўйича фалсафа доктори Д.Хидоятова томонидан олиб борилди.

Тадбир давомида малака ошириш жараёнида таълим бериш шакллари, турлари ва моделлари кўриб чиқилди, SWOT таҳлил ўтказиш методикаси, ўқитишнинг турли методикалари атрофлича муҳокама қилинди.

Иштирокчилар кичик гуруҳларга бўлинган ҳолда экстрафаол, интрофаол, фаол ва интерфаол ўқитиш турларинининг қиёсий таҳлили асосида  катталар таълимида интерфаол метод афзалликларини аниқлаб олдилар.

Мазкур фаолиятнинг тизимли тарзда амалга оширилиши Академия таълим салоҳиятини ошириш ҳамда ўқув курсларини илғор таълим стандартлари асосида ташкил этишга хизмат қилади.