Департаментнинг ишга янги қабул қилинган ходимлари учун ўтказилган малака ошириш курси якунланди

Бош прокуратура Академиясида Иқтисодий жиноятларга қарши курашиш департаментининг ишга янги қабул қилинган ходимлари учун ташкил этилган масофавий малака ошириш курси якунланди.

Давоимийлиги 144 соат бўлган ўқув курси дастури прокуратура органлари фаолиятини ташкил этиш, иш юритиш ва ҳужжатларни расмийлаштириш, суриштирув ва тезкор-қидирув фаолиятини ташкил этиш, иқтисодий жиноятларга, шу жумладан жиноий фаолиятдан олинган даромадларни легаллаштиришга қарши курашишни ташкил этиш масалаларини қамраб олди.

Тингловчиларнинг умумий компетенциялари, шахсий ва ишчанлик сифатларини ривожлантириш мақсадида вақтни унумли бошқариш, психологик барқарорликни таъминлаш, жамоада соғлом маънавий-психологик муҳитни шакллантириш, низоларнинг олдини олиш ва мулоқот психологияси бўйича ўқув машғулотлари ўтказилди.

Малака ошириш курси давомида илғор таълим технологияларини қўллаган ҳолда синхрон режимда амалий машғулотлар ташкил этилиб, тингловчилар назарий машғулотлар давомида ўзлаштирган билим ва кўникмалари мустаҳкамланди.

Курс якуни бўйича якуний назорат имтиҳони ўтказилиб, тингловчиларга малака оширганлик тўғрисида сертификатлар топширилди.