Академия магистратураси: тингловчилар учун имкониятлар ва истиқболлар

Бош прокуратура Академияси ва Тошкент давлат юридик университети ўртасидаги ўзаро ҳамкорлик тўғрисидаги Меморандум ижроси доирасида Бош прокуратуранинг кадрлар бошқармаси ва Академияси ходимларининг Тошкент давлат юридик университети битирувчи талабалари билан онлайн шаклда учрашуви бўлиб ўтди.

Учрашувда университет масъул ходимлари, бакалавр босқичи битирувчилари ва талабалари, Академия магистратураси битирувчилари ва тингловчилари, шу жумладан Швециянинг Лунд университетида таҳсил олаётган тингловчилар иштирок этди.

Тадбирда талабаларга прокуратура органларига хизматга қабул қилиш тартиби, Бош прокуратура Академияси фаолияти йўналишлари, хусусан магистратурага қабул ва унда ўқишнинг ўзига хос афзалликлари ҳақида батафсил маълумот берилди.

Талабаларда Академияда республикамизда биринчи бўлиб магистратуранинг уникал мутахассисликлари бўйича ўқитиш тизимининг жорий қилинганлиги, назария ва амалиётнинг уйғунлиги, хорижий давлатларнинг нуфузли олий таълим муассасалари экспертларининг таълим жараёнига жалб қилиниши ҳамда талабаларнинг академик мобиллик дастурлари доирасида хорижий таълим муассасаларида ўқиш имконияти мавжудлиги алоҳида қизиқиш уйғотди.

Учрашув давомида талабалардан келиб тушган саволларга батафсил жавоблар берилди.