“Ҳуқуқни қўллашнинг ягона амалиёти” мавзусидаги 1-республика танлови

2021 йилнинг 23 февралида Бош прокуратура Академияси ва Ёшлар Иттифоқи ҳамкорлигида “moot court” форматида “Ҳуқуқни қўллашнинг ягона амалиёти” масалаларига бағишланган 1-республика танлови ўтказилди.

Танловни ўтказишдан мақсад – мавжуд кейс асосида, тизимли таҳлилни қўллаган ҳолда амалиётда учраётган муаммоларнинг ечимини топишга эътибор қаратиш. Ташкилотчилар томонидан қўйилган асосий вазифа бир томондан, назарий билимларини амалиётда тўғри қўллай олишни назарда тутса, иккинчи томондан, магистрлар олдида жамоада келишиб ишлашни ўрганишларига бўлган зарурат ҳисобланади.

Танловда Қорақалпоқ Давлат Университети, Тошкент давлат юридик университети, Жаҳон иқтисодиёти ва дипломатия университети, шунингдек Бош прокуратура Академиясининг магистратура талабалари иштирок этди.

Жюри аъзолари сифатида ушбу танловга Ўзбекистон Республикаси Олий Мажлис Сенати қўмитаси раисининг ўринбосари Ш.Чуллиев, Қонунчилик палатаси қўмитаси раисининг ўринбосари Қ.Жўраев, Адвокатлар палатаси раиси А.Эрназаров, Тошкентдаги халқаро арбитраж маркази вакили Н.Маликовлар жалб этилди.

Танлов жараёнида ҳар бир жамоага алоҳида вазифалар берилди, хусусан:

кейс асосида жисмоний шахснинг Конституциявий судга мурожаатини тайёрлаш;

юқоридаги мурожаат асосида эксперт комиссияси хулосасини шакллантириш;

эксперт комиссиясининг хулосасига таяниб, Конституциявий суднинг қарорини тайёрлаш;

юқоридагилардан келиб чиқиб, “Норматив-ҳуқуқий ҳужжатлар тўғрисида”ги қонунга ўзгартиш ва қўшимчалар ишлаб чиқиш.

Танлов жараёнида ҳар бир жамоа тегишли босқичда ифодалаган позициясини нафақат баён этди, балки жюри аъзолари ва рақиб жамоалар тарафидан берилган савол-жавоблар жараёнида уни қатъий ҳимоя қилди. Танлов тортишув руҳида ўтди. Ғолиблар муносиб тақдирланди.