ARIN-WCA тармоғи Бошқарув гуруҳининг йиғилиши ўтказилди

2021 йил 1 март куни Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) Котибияти вазифасини амалга ошириши доирасида БМТнинг Наркотик моддалар ва жиноятчилик бўйича бошқармаси (UNODC) билан ҳамкорликда мазкур тармоқ Бошқарув гуруҳи аъзоларининг навбатдаги йиғилишини ташкиллаштирди.

Йиғилиш видеоконференцалоқа воситасида ўтказилиб, унда Бошқарув гуруҳи аъзолари – Покистон, Туркманистон, Эрон ва Ўзбекистон вакиллари, UNODC ҳудудий лойиҳа координатори Данило Камписи ҳамда халқаро эксперт Джилл Томас иштирок этишди.

ARIN-WCA Котибияти сифатида Бош прокуратура Академияси Бошқарув гуруҳи аъзоларини тармоқни бошқариш доирасида 2020 йилда амалга оширилган ишлар билан таништириб, келгусидаги муҳим режалар тўғрисида хабардор қилди.

Йиғилиш якунларига кўра ARIN-WCA фаолиятини такомиллаштириш бўйича амалга оширилиши керак бўлган муҳим вазифа ва тадбирлар белгилаб олинди.