Янги тайинланган туман ва шаҳар прокурорлари малакасини ошириш курси бошланди

2020 йил 10 февраль куни Бош прокуратура Академиясида янги тайинланган туман (шаҳар) прокурорлари иштирокида “Прокуратура органларида бошқарув ва ишни ташкил этишнинг долзарб масалалари” мавзусида малака ошириш курси ўқув машғулотлари бошланди.

Икки ҳафталик ўқув курси янги тайинланган прокурорларда прокуратура органлари ҳудудий тармоқлари фаолиятини самарали ташкил этиш, коррупцияга қарши курашишнинг таъсирчан чора-тадбирлари, муаммолар ва зиддиятли вазиятлар ечими, қарор қабул қилиш, манфаатлар тўқнашувининг олдини олиш ва бошқа долзарб масалалар борасида бошқарув кўникмалари ва касбий компетенцияларини шакллантириш ва ривожлантиришга йўналтирилган.

Курс дастурида маҳаллий ижро ҳокимияти органлари билан ҳамкорлик масалалари, ҳудудларни ижтимоий-иқтисодий ривожлантириш бўйича секторлар фаолияти, фуқаролар мурожаатлари билан ишлаш масалаларига алоҳида эътибор қаратилган.