АҚШнинг Вашингтон университети мутаxассиси Бош прокуратура Академияси ўқув жараёнларига жалб қилинди

Академия ташкил этилганидан буён АҚШнинг  Халқаро Тараққиёт Агентлиги (USAID)нинг Ўзбекистондаги суд-ҳуқуқ ислоҳотлари дастури билан самарали ҳамкорлик йўлга қўйилиб, ўқув жараёнларига чет эллик юқори малакали мутаxассисларни жалб қилиш бўйича ишлар доимий равишда олиб борилмоқда.

Ушбу соҳада эришилган ютуқларнинг давоми сифатида Вашингтон университети (АҚШ) “Юридик инглиз тили” дастурининг етакчи ўқитувчиси, ушбу соҳада ўқув дастурларини яратиш ва такомиллаштиришда кўп йиллик тажрибага эга бўлган Патрисия Маклаулин иштирокида бир ҳафталик ўқув-семинар ташкил этилди.

Семинарда Академия xодимлари иштирок этиб, инглиз тилидаги юридик терминларни қўллаш соҳасида фойдали билим ва кўникмаларга эга бўлдилар.

Шунингдек, жорий йилнинг 10-14 февраль кунлари Академия магистратураси тингловчилари учун “Юридик инглиз тили” дастури доирасида бир қатор маъруза ва семинарлар ташкил этилди.

Келгусида ҳамкорлик тадбирлари масофадан туриб давом эттирилишига келишиб олинди.