Академия магистратураси тингловчиларининг Тошкент вилояти Бўстонлиқ туманига ўқув-амалий ташрифи

Ўқитишнинг амалий хусусияти ва прокуратура органларининг касбий фаолияти билан узвий боғлиқликни таъминлаш мақсадида Академия магистратураси тингловчиларининг ҳудудий прокуратура органларига  ўқув-амалий ташрифи мунтазам ташкил этиб келинмоқда. 

Магистратура тингловчиларининг навбатдаги  ўқув-амалий ташрифи Бўстонлиқ туман прокуратураси ва туман прокурори бошчилигидаги ҳудудларни комплекс ижтимоий-иқтисодий ривожлантириш бўйича секторда бўлиб ўтиб, тингловчилар туман прокуратураси ва сектори фаолиятига доир маълумот ҳамда ҳудудда истиқболли инвестициявий лойиҳаларни амалга оширишга оид режалар билан яқиндан танишдилар.

Ўқув-амалий ташриф доирасида тингловчилар Тошкент вилояти прокуратураси органлари тизимида яқинда ташкил этилган янги тузилма – Тошкент табиатни муҳофаза қилиш прокуратураcига ташриф буюриб, прокуратура томонидан амалга оширилаётган кенг қамровли ишлар, хусусан, табиатни муҳофаза қилишга оид қонунчилик ижроси устидан назорат ҳамда ерлардан ноқонуний фойдаланишни бартараф этиш бўйича кўрилаётган самарали чоралар тўғрисида батафсил маълумотга эга бўлдилар.

Тадбир якунида туманнинг туристик ва рекреацион имкониятлари билан таништириш мақсадида тингловчилар туристик объектларга ташриф буюриб, у ерда ички туризм, шунингдек хорижий сайёҳларни жалб этиш борасида амалга оширилаётган кенг қамровли тадбирлар тақдимоти билан танишдилар.