Халқаро экспертлар иштирокида “Параллел молиявий текширув ва жиноий активларни қайтаришни ташкил этиш ва ўтказиш” мавзусида тренинг ўтказилди

Академия томонидан БМТнинг Гиёҳвандлик ва жиноятчиликка қарши курашиш бошқармаси ва Жаҳон банки билан ҳамкорликда Жиноий активларни қайтариш ташаббуси (StAR) доирасида параллел молиявий текширув ўтказиш масалалари бўйича икки кунлик тренинг ташкил этилди.

Тадбирда халқаро экспертлар – БМТ ГЖБнинг жиноятчиликни олдини олиш ва жиноий одил судлов масалалари бўйича ходими В.Козин, StAR мутахассиси Дж.Бентон, шунингдек Бош прокуратура, Академия, Бош прокуратура ҳузуридаги Иқтисодий жиноятларга қарши курашиш департаменти, Ички ишлар вазирлиги, Давлат божхона қўмитаси ва Марказий банкнинг вакиллари иштирок этдилар.

Тренинг давомида Буюк Британиянинг ҳуқуқни муҳофаза қилувчи органларида коррупцияга ва жиноий даромадларни легаллаштиришга қарши курашиш соҳасида катта тажрибага эга бўлган, коррупцияга қарши курашиш бўйича юқори даражадаги мутахассис ва StAR халқаро эксперти Дж.Бентон иштирокчиларни соҳага оид халқаро стандартлар, параллел молиявий текширув ўтказишнинг босқичлари, активларни кузатиш инструментлари билан таништирди.

Амалий машғулотлар жараёнида иштирокчилар ўзларининг параллел молиявий текширув ўтказиш, мазкур йўналишда расмий, норасмий ҳамда идоралараро ҳамкорлик борасидаги кўникмаларини синаб кўришди.