Янги Ўзбекистонда конституциявий назорат

2021 йил 4 июнда Ўзбекистон Республикаси Бош прокуратураси Академиясида 2021 йил 27 апрелида қабул қилинган “Ўзбекистон Республикаси Конституциявий суди тўғрисида”ги янги Конституциявий қонун мазмун-моҳияти муҳокамасига бағишлаб Ўзбекистон Республикаси Конституциявий суди билан ҳамкорликда ташкил этилган “Янги Ўзбекистонда конституциявий назорат”  мавзусидаги давра суҳбати бўлиб ўтди.

Тадбирни Академия бошлиғи Е.Коленко кириш сўзи билан очиб, инсон конституциявий ҳуқуқ ва эркинликларини ишончли ҳимоя қилишга қаратилган янги қонуннинг бир қатор принципиал янги нормаларини таъкидлаб ўтди.

Ўзбекистон Республикаси Конституциявий суди раиси ўринбосари А.Ғафуров конституциявий одил судловни янги даврини бошлаб берадиган қатор янгиликлар борасида батафсил маълумот берди. Хусусан, маърузада таъкидланишича, Қонун билан Конституциявий судга масалалар киритиш ҳуқуқига эга бўлган субъектлар доираси кенгайтирилиб, улар қаторига Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман) ўринбосари – Бола ҳуқуқлари бўйича вакил, Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда фуқаролар ва юридик шахслар киритилди.

Қонуннинг муҳим жиҳатларидан бири фуқаролар ва юридик шахсларга муайян ишда қўлланилган ва Конституцияга мувофиқ бўлмаган қонун билан уларнинг конституциявий ҳуқуқлари бузилганлиги юзасидан шикоят билан Конституциявий судга мурожаат қилиш ҳуқуқи берилганлиги бўлди. Мазкур механизмнинг жорий этилиши Конституциянинг 44-моддасида мустаҳкамланган ҳар бир шахс ҳуқуқ ва эркинликларининг суд орқали ҳимоя қилинишини ишончли кафолатлашга хизмат қилади. 

Давра суҳбатида сўзга чиққан Бош прокуратураси Академияси бошлиғининг ўринбосари М.Мамасиддиқов Конституциявий суд фаолиятини тартибга солувчи қонунчилик асосларини такомиллаштиришнинг аҳамияти ҳақида фикр юритди. 

Давра суҳбати якунида Академия докторантлари ва мустақил изланувчилари иштирокида Конституциявий суд томонидан фуқаролар мурожаатларини кўриб чиқиш тартиби ҳамда Конституциявий суд қарорлдарини ижрога қаратиш масалаларига оид савол-жавоблар ва мунозаралар бўлиб ўтди.