Ўзбекистон Республикаси Бош прокуратураси Академияси магистратураси: натижалар ва ривожланиш истиқболлари

Ўзбекистон Республикаси Бош прокуратураси Академияси магистратурасига 2021/2022 ўқув йили учун номзодлар қабули бошланмоқда.

Академия магистратурасига номзодларни қабул қилиш тенг ҳуқуқлилик, қабул ва танловнинг ягона қоидалари, шунингдек очиқлик ва шаффофлик асосида, субъективизм ва инсон омили асоссиз таъсирининг ҳар қандай кўринишларини истисно қилган ҳолда амалга оширилади.

Имтиҳон жараёнлари давлат органлари, олий таълим муассасалари, шунингдек, “Буюк келажак” ХННТ, “Юксалиш” умуммиллий ҳаракати, Ёшлар иттифоқи каби нодавлат нотижорат ташкилотлари вакилларининг холис кузатуви остида ўтказилади. Бутун имтиҳон жараёни ОАВ ва Академиянинг ижтимоий тармоқлардаги расмий саҳифалари орқали кенг жамоатчиликка ёритиб борилади.

Веб-сайт: www.proacademy.uz

Facebook: www.facebook.com/ProsecutorAcademy

Instagram: www.instagram.com/proacademyuz/

Twitter: www.twitter.com/ProAcademyUz

Магистратурага танлов “Юриспруденция” мутахассислиги бўйича олий юридик маълумотга эга бўлган шахслар орасида ўтказилади.

Академия магистратурасида “Коррупцияга қарши курашиш”, “Прокурорлик фаолияти” ва “Тергов фаолияти”, шунингдек 2021/2022 ўқув йилидан бошлаб “Инсон ҳуқуқларига оид халқаро ҳуқуқ” мутахассисликлари бўйича ўқитиш амалга оширилади.

2021/2022 ўқув йилида 40 та, шу жумладан давлат гранти бўйича – 24 та ва тўлов контракти асосида – 16 та қабул квотаси тасдиқланган бўлиб, улардан:

– прокуратура органлари ходимлари учун квота – 20 та (ҳар бир йўналиш бўйича 5 тадан);

– очиқ танлов бўйича квота – 20 та, шу жумладан давлат гранти асосида 4 та (ҳар бир йўналишда 1 тадан) ва тўлов контракти асосида 16 та.

Академия магистратурасига кириш имтиҳонларини ташкил этиш ва ўтказиш жараёнлари инновацион ёндашувлар ҳамда замонавий ахборот-коммуникация технологияларидан фойдаланган ҳолда амалга оширилади.

Хусусан, номзодлар томонидан имтиҳон саволларини ўз ичига олган имтиҳон билетлари танлови билетлар рақамини автоматик генерация қилувчи Академия томонидан махсус ишлаб чиқилган дастур орқали амалга оширилади. Номзодларга индивидуал идентификация рақамлари берилади, имтиҳон натижалари эса тўлиқ шифрланади.

Магистратурага ўқишга қабул қилиш жараёнини юқори ташкилий савияда ўтказиш, адолатли танлов, холислик ва ошкораликни таъминлаш мақсадида Бош прокурор буйруғига асосан Академия ва прокуратура органлари ходимлари, юқори нуфузга эга бўлган ҳуқуқшунос олимлар ва суд-ҳуқуқ соҳаси вакилларидан ташкил топган комиссия ва эксперт гуруҳлари ташкил этилади.

Зарур ҳужжатлар, имтиҳонлар ўтказиш шакли, баҳолаш мезонлари ҳамда номзодларга қўйилган талаблар ҳақидаги маълумотлар Академиянинг расмий веб-сайти ва ижтимоий тармоқларида жойлаштириб борилади.

Барча номзодларга муносиб тайёргарлик кўришлари учун тенг имкониятларни яратиш ҳамда турли хил коррупциявий омилларни чеклаш мақсадида имтиҳон саволлари (топшириқлари) олдиндан Академиянинг расмий веб-сайтида жойлаштирилади (www.proacademy.uz).

Кириш имтиҳонларини ташкил этиш ва ўтказишда номзодлар билимини тўлиқ ва холисона баҳолашни таъминлаш, натижада энг муносиб ва иқтидорли тингловчиларни танлаб олишга устувор аҳамият берилади. Кириш имтиҳонлари ёзма имтиҳон ва суҳбатдан иборат бўлиб, бунда номзоднинг билим ва кўникмалари даражаси унинг ёзма ва оғзаки нутқ кўникмалари асосида баҳоланади.

Ёзма имтиҳон ҳуқуқий мавзуда эссе ва чет тили бўйича тест саволларидан иборат бўлади. Чет тили бўйича тегишли сертификатга эга бўлган номзодларга ушбу имтиҳон тури бўйича энг юқори балл берилиб, имтиҳон топширишдан озод қилинади.

Мутахассислик фанлари бўйича ёзма имтиҳон билетлари ҳуқуқшунослик фанлари (фуқаролик, жиноят, жиноят-процессуал, меҳнат ҳуқуқи ва бошқалар) бўйича эссе мавзуларидан иборат бўлади.

Шу билан бирга, номзодга таклиф этилган саволлар орасидан ўзига энг яқин бўлган мавзуни танлаш имконияти берилади, бу эса уларнинг қобилияти ва билимларини янада юқори даражада очиб беришга ёрдам беради.

Мутахассислик бўйича ёзма имтиҳондан муваффаққиятли ўтган номзодлар кириш имтиҳонларининг кейинги босқичи – суҳбатга киритиладилар.

Суҳбат жараёни, ёзма имтиҳон каби онлайн тарзда трансляция қилинади.

Чет тили, ёзма имтиҳон ва суҳбат натижаларига кўра энг юқори балл тўплаган номзодлар Академия магистратураси тингловчилари сафига қабул қилинади.

Бугунги кунда Академияда янгича фикрлайдиган, замонавий билим ва амалий кўникмаларни пухта эгаллаган ҳамда чуқур таҳлилий қобилиятга эга бўлган ёш авлод кадрларини тайёрлашга қаратилган зарур илмий-маърифий салоҳият шакллантирилган.

Магистратура мутахассисликлари бўйича кадрларни тайёрлашга қаратилган таълим жараёни улкан профессионал тажрибага эга бўлган Академиянинг профессор-ўқитувчилари таркиби ҳамда илғор миллий, хорижий ва халқаро экспертлардан иборат экспертлар жамоаси томонидан илғор инновацион дастурларга асосан назариянинг амалиёт билан уйғунлигини таъминлаган ҳолда олиб борилмоқда.

Академиядаги ўқув жараёнининг муҳим жиҳати шундаки, хорижий мамлакатларнинг давлат ва ҳуқуқни муҳофаза қилувчи органларида турли лавозимларда фаолият юритган, ўз соҳасининг тан олинган етук мутахассислари бўлган катта амалий тажрибага эга халқаро экспертлар ўқув машғулотларига узоқ муддатга жалб этиб борилади.

Масалан, Академиянинг халқаро ҳамкорлари кўмагида “Коррупцияга қарши курашиш” мутахассислиги бўйича ўқув дастурлари Австриянинг Вена шаҳридаги Халқаро коррупцияга қарши курашиш академиясини кўп йиллар мобайнида бошқарган Мартин Кройтнер ва Словениянинг коррупцияга қарши комиссияси раҳбари сифатида хизмат қилган Горан Клеменчич каби жаҳон миқёсидаги экспертлар томонидан илғор халқаро стандартлар асосида такомиллаштирилган.

Ўқув йили давомида юридик инглиз тили модули бўйича юридик ҳужжатларни тузиш, ёзма ва оғзаки компетенцияларни шакллантиришга алоҳида эътибор қаратилади. Шу билан бирга, бу жараёнга тил соҳиблари бўлган – АҚШлик экспертлар Мэдисон Крстич ва Жошуа Захаров жалб этилди.

Янги ўқув йилида Швециянинг Лунд университетидан 2 нафар эксперт Академияда бўлиб, ўқув жараёнида иштирок этиши режалаштирилган.

Академиянинг суд жараёни, тергов-криминалистика ва тезкор қидирув жараёнларини имитация қилувчи махсус жиҳозланган ўқув хоналарида ўтказиладиган амалий ўқув машғулотлари тингловчилар томонидан ўзлаштирилган назарий билимларни қўллаш ҳамда зарур кўникма ва малакаларни шакллантиришга ёрдам беради ва шундай қилиб, амалиётга йўналтирилган learning by doing усули самарадорлигини намойиш этади.

Академия тингловчилари Бош прокуратура ва ҳудудий прокуратуралар органлари, хусусан секторлар фаолияти билан яқиндан танишиш, мурожаатларни кўриб чиқишда иштирок этиш ва фуқароларни бевосита қабул қилиш, воқеа жойларига чиқиш, тергов-процессуал ҳужжатларни расмийлаштиришда қатнашиш, криминалистика тактикаси ва техникасини ўзлаштириш имкониятига эга бўлади.

Шу билан бирга, тингловчиларда фуқароларни қабул қилиш, уларнинг мурожаатларини кўриб чиқиш ҳамда ҳал этиш билан боғлиқ илк кўникмаларни шакллантириш мақсадида улар Бош прокуратуранинг мурожаатлар билан ишлаш бошқармаси негизида ташкил этилган юридик клиникада амалиёт ўтадийлар.

Шунингдек, талабалар учун дала ўқув машғулотлари ташкил этилиб, уларнинг кўламини кенгайтириш янги ўқув йилида ўқув жараёнини ташкил этишнинг устувор вазифаларидан бири этиб белгиланган.

Академияда тингловчиларнинг танқидий фикрлаш, масъулият, интизомга риоя қилиш, етакчилик, мулоқотга киришувчанлик каби шахсий сифатлари ва кўникмаларини ривожлантириш мақсадида психологларни жалб этган холда махсус машғулотлар ташкил этилади.

Академия академик мобиллик дастурларини фаол амалга оширмоқда.

Хусусан, илгари эришилган келишувлар доирасида Академия магистратурасининг 3 нафар тингловчиси Швециянинг Лунд университетида таҳсил олди. Янги 2021/2022 ўқув йилида академик мобиллик доирасидаги мазкур амалиёт давом эттирилади.

Академия кўмагида магистратура тингловчилари мунтазам равишда, жумладан, маърузачи сифатида, турли халқаро конференциялар, форумлар ва бошқа тадбирларда иштирок этишади. Ўтган давр ичида Япония, Германия, Швеция, Қозоғистон, Озарбайжон ва бошқа мамлакатларда ўтказилган тадбирлардаги иштироки тингловчилар бу орқали катта тажриба орттирдилар.

БМТнинг жиноятчиликнинг олдини олиш дастури доирасида ўтказилган Киото Конгресси Ёшлар Форумида дунёнинг турли мамлакатларидан қатнашган 150 нафардан ортиқ ёшлар қаторида иштирок этган Академия тингловчилари Япония Адлия вазирлигининг тегишли сертификатлари билан тақдирландилар.

Академияси магистрантлари диссертация мавзусига мувофиқ бўлган Япония халқаро ҳамкорлик ташкилоти (JICA) томонидан ташкил этилган “Йўл ҳаракати хавфсизлиги” мавзусидаги халқаро ўқув курсида иштирок этди.

Шунингдек, магистратура тингловчилари муҳим тадбирларни ўтказиш бўйича ташаббус билдириб келдилар.

БМТнинг коррупцияга қарши Конвенциясини имплементация қилишга бағишланган Бирлашган Миллатлар Ташкилотининг Модели – амалий ўйин белгиларини мужассам этган конференция.

Академия тингловчилари ташаббуси асосида Япония халқаро ҳамкорлик агентлиги билан ҳамкорликда ташкил этилган “Йўл ҳаракати хавфсизлигини таъминлашнинг долзарб муаммолари ва бу соҳада ҳуқуқбузарликларнинг профилактикаси” мавзусидаги халқаро илмий-амалий конференция.

Ёшлар иттифоқи ҳамкорлигида “moot court” форматида “Ҳуқуқни қўллашнинг ягона амалиёти” масалаларига бағишланган 1-республика танлови ўтказилиб, унда Академия магистратураси тингловчилари билан бир қаторда Қорақалпоқ давлат университети, Тошкент давлат юридик университети ҳамда Жаҳон иқтисодиёти ва дипломатия университети магистратура талабалари иштирок этди (https://www.youtube.com/watch?v=F2RkXek7lpM).

Магистратура тингловчиларининг илмий-тадқиқот фаолияти энг устувор йўналишлардан бири бўлиб, ўқув йили давомида диққат марказида бўлиб келмоқда. Академия профессор-ўқитувчилари тингловчиларнинг илмий-тадқиқот фаолиятига илмий раҳбар ва илмий маслаҳатчи сифатида ҳамроҳлик қилса, Бош прокуратуранинг ходимлари амалиётдан маслаҳатчи сифатида уларга амалдаги қонунчилик ва ҳуқуқни қўллаш амалиётини такомиллаштириш бўйича аниқ таклифлар тайёрлашга, магистрлик ишининг прокуратура органлари амалий фаолияти билан узвий боғлиқлигини таъминлашга яқиндан кўмак берадилар.

Бундан ташқари, тингловчилар диссертация мавзуларига мос равишда Ўзбекистон Республикаси Президенти ҳузуридаги давлат хизматини ривожлантириш агентлиги, Коррупцияга қарши курашиш агентлиги, прокуратура, суд ва ички ишлар органларида амалиёт ўтайди.

Академияда ҳуқуқ-тартибот ва бошқа давлат идораларида хизмат қилишни танлаган иқтидорли ва ижодкор ҳуқуқшунослар учун юқори натижаларга эришиш ва касбий ўсишда зарур бўлган чуқур билим ва касбий кўникмаларни эгаллаши учун кенг имкониятлар ва илмий-маърифий муҳит яратилган.

Шундай қилиб, агар сиз қонунга хизмат қилиш йўлида ўқитиш ва таълим олиш мақсади бўлган етакчи мутахассислар орасида бўлишни истасангиз, унда бу илм даргоҳи сиз учун.

Сизларни Бош прокуратура Академиясида кутиб қоламиз.

Маълумот учун телефон: 71-202-04-96 (ички:1775)