Тергов кадрларини тайёрлаш соҳасида халқаро ҳамкорлик ривожланмоқда

        Илм-фан, таълим ва прокурор-тергов фаолиятининг узвий боғлиқлигини ҳамда таълим сифатини таъминлаш мақсадида илғор халқаро тажриба ва ижобий амалиётларни ўрганиш ва жорий этишга қаратилган халқаро ва идоралараро ҳамкорликни амалга ошириш Бош прокуратура Академияси фаолиятининг муҳим йўналишларидан ҳисобланади.

       Шу муносабат билан, Ўзбекистон Республикаси Бош прокуратураси ва Россия Федерацияси Тергов қўмитаси, шунингдек томонларнинг идоравий таълим муассасалари  ўртасида илгари имзоланган икки томонлама келишувлар доирасида 2021 йил 16 сентябрь куни Россия Федерацияси Тергов қўмитаси Москва ва Санкт-Петербург академиялари делегацияси Ўзбекистон Республикаси Бош прокуратураси Академиясига ташрифи бошланди.

       Ташриф дастурида икки томонлама учрашувлар, Академия фаолияти билан танишув, шунингдек Бош прокуратура, қуйи прокуратуралар, Ички ишлар вазирлиги терговчилари ва Бош прокуратура Академияси профессор-ўқитувчилари учун "Шахсга, жамоат хавфсизлигига, давлат ҳокимиятига қарши ва иқтисодиёт соҳасидаги жиноятларни тергов қилиш" мавзусида малака ошириш курси ўтказилиши назарда тутилган.

       Бу каби маърифий тадбирлар ҳуқуқни муҳофаза қилиш фаолияти ҳамда кадрлар тайёрлашнинг сифати ва самарадорлигини оширишга хизмат қилади.