Академияда Ўзбекистон прокуратураси фахрийлари билан учрашув

Давлатимиз Раҳбарининг ташаббуси билан мамлакатимизда кекса авлод вакилларини ҳар томонлама қўллаб-қувватлаш, уларнинг ёш авлодни халқимизнинг кўп асрлик анъаналарини ҳурмат қилиш руҳида тарбиялаш ишидаги ролини оширишга қаратилган кенг кўламли ишлар амалга оширилмоқда.

Республикамизда ўтказилаётган “Кексалар ҳафталиги” доирасида 2021 йил 8 октябрь куни Бош прокуратура Академиясида Ўзбекистон прокуратураси фахрийлари ҳамда Академия тингловчилари иштирокида “Адолат тарозисини маҳкам тутиб” мавзусида давра суҳбати ташкил этилди.

Таъкидлаш лозимки, прокуратура органларида кўп йиллар фидокорона хизмат қилган фахрийларимиз бугун ҳам биз билан бир сафда туриб, ёшларнинг касбий маҳорати ва малакасини ошириш ҳамда уларни қасамёдига садоқат руҳида тарбиялашга муносиб ҳисса қўшиб келмоқда.

Давра суҳбатида прокуратура органлари фахрийлари ўзларининг қонун устуворлигини таъминлаш, қонунийликни мустаҳкамлаш, фуқароларнинг ҳуқуқ ва эркинликларини, жамият ва давлатнинг қонун билан қўриқланадиган манфаатларини ҳимоя қилиш соҳасидаги бой ва ибратли ҳаёт тажрибалари, амалий билим ва кўникмалари билан ўртоқлашдилар.

Шунингдек тадбирда прокуратура органларида “Устоз-шогирд” анъаналари тикланиб, ёшларнинг устоз ва мураббийлар билан узвий ҳамкорлиги йўлга қўйилгани кадрларни тайёрлаш, тарбиялаш ҳамда уларни ўз касбининг етук мутахассиси бўлиб етишишларида улкан аҳамият касб этиши алоҳида эътироф этилди.