Диссертация ҳимояси бўлиб ўтди

Бош прокуратураси Академияси ҳузуридаги илмий даражалар берувчи Илмий кенгашнинг йиғилишида Академия мустақил изланувчиси Ш.Шайзаковнинг 12.00.07 ихтисослиги бўйича тайёрлаган “Маъмурий суд ишларини юритишда прокурор иштирокининг ташкилий-ҳуқуқий асослари: қиёсий-ҳуқуқий таҳлил” мавзусидаги диссертациясининг ҳимояси бўлиб ўтди.

Юридик фанлар бўйича фалсафа доктори илмий даражасини олиш учун тайёрланган ушбу диссертация доирасида Ўзбекистон Республикасида ва хорижий мамлакатларда маъмурий суд ишларини юритишда прокурор иштироки ва унинг процессуал-ҳуқуқий мақоми билан боғлиқ масалалар ўрганилган.

Диссертацияда маъмурий суд ишларини юритишда прокурор иштирокини қонунчиликка киритиш, маъмурий суд ишларини юритишда прокурор вазифалари, мақсади, ваколатлари, прокурор фаолиятини баҳолаш мезонлари, маъмурий ва оммавий ҳуқуқий муносабатларда прокурор иштирокининг зарурияти асослантирилган.

Илмий кенгаш аъзолари томонидан мазкур илмий иш бир овоздан ижобий баҳоланиб, Ш.Шайзаковнинг диссертацияси тугалланган деб ҳисобланиб, юридик фанлари бўйича фалсафа доктори (PhD) илмий даражасини бериш юзасидан Вазирлар Маҳкамаси ҳузуридаги Олий аттестация комиссиясига ҳужжатларни тақдим этиш юзасидан қарор қабул қилинди.

Академия жамоаси Ш.Шайзаковни диссертацияни муваффақиятли ҳимоя қилганлиги билан табриклайди ва келгусидаги илмий ва касбий фаолиятида улкан зафарлар тилайди.