Халқаро экспертлар иштирокида “Адолатли суд муҳокамасига бўлган ҳуқуқ” мавзусидаги курс ўз ишини бошлади

Инсон ҳуқуқлари бўйича Ўзбекистон Республикасининг Миллий стратегиясини амалга ошириш мақсадида Академияда жорий ўқув йилида янги “Инсон ҳуқуқларига оид халқаро ҳуқуқ” магистратура дастури жорий этилди.

ЕХҲТ лойиҳалари координатори офисининг Ўзбекистондаги ваколатхонаси, БМТнинг Инсон ҳуқуқлари бўйича Олий комиссари ва USAID халқаро ташкилотларининг кўмагида академик дастур ва ўқув модулларини ишлаб чиқиш ишларига илғор илмий-таълим муассасалари ва ташкилотларининг, жумладан Рауль Валленберг номидаги Инсон ҳуқуқлари ва халқаро гуманитар ҳуқуқ институти, Лунд университети (Швеция), Бристоль университети (Буюк Британия), Калифорния университетининг Гастинг ҳуқуқ мактаби (АҚШ) экспертлари жалб қилинди.

Мазкур магистратура дастури доирасида Рауль Валленберг номидаги Инсон ҳуқуқлари ва халқаро гуманитар ҳуқуқ институтининг профессорлари Карл Новак, Ляль Сунга, Андреас Юнгхольм, Жош Унстед, Зузана Залановалар томонидан ЕХҲТ лойиҳалари координатори офисининг Ўзбекистондаги ваколатхонаси кўмагида ишлаб чиқилган  “Адолатли суд муҳокамасига бўлган ҳуқуқ” мавзусидаги асосий модуллардан бири бўйича ўқув машғулотлари бошланди.

Ушбу курс жиноий суд иш юритувининг судга қадар ҳамда суд босқичларини ўз ичига олган.

Профессор Л.Сунга томонидан мазкур йўналишда таҳсил олаётган магистратура тингловчилари учун адолатли суд муҳокамасига бўлган ҳуқуқнинг асосий концепциялари, халқаро стандартлар ва амалиёт бўйича маърузалар қилиниб, амалий билим ва кўникмаларни ривожлантириш мақсадида имитацион машқлар ўтказилмоқда.