Бош прокуратура Академияси Британия Кенгашининг Change Academy дастурида иштирок этмоқда

Бош прокуратура Академияси Британия Кенгашининг Олий ва ўрта-махсус таълим вазирлиги билан ҳамкорликда Ўзбекистонда амалга оширилаётган “Going Global Partnership” дастурининг бир қисми бўлган Change Academy лойиҳасида иштирок этиш учун Ўзбекистон таълим муассасалари ўртасида ўтказилган танлов натижаларига кўра ғолиб бўлди.

Лойиҳа олий таьлим тизимининг салоҳиятини ошириш ва халқаролаштириш, тажриба алмашиш ва педагогик инновацияларни қўллаб-қувватлаш, Британия университетлари билан узоқ муддатли ҳамкорликни йўлга қўйишга қаратилган.

12 та ҳамкор олий таълим муассасалари вакиллари орасидан танлаб олинган жамоа 2021 йилнинг ноябридан 2022 йилнинг февралигача британиялик мутахассислар иштирокидаги олий таълимни режалаштириш, таълим сифатини таъминлаш, академик мобилликни ривожлантириш, касб-ҳунар таълимида ва меҳнат бозорида мулоқотни мустаҳкамлаш бўйича интенсив ўқув курсида таҳсил олади.

Лойиҳада шунингдек таълим сифатини, шу жумладан мослашувчан, функционал ва динамик электрон таьлим муҳитини халқаро таълим стандартларига мос равишда такомиллаштириш мақсадида Академиянинг ривожланиш режасини амалга ошириш учун Ўзбекистон ва Буюк Британиянинг олий таълим соҳасидаги етакчи институтлари билан ҳамкорлик қилиш назарда тутилган.