Давлат хизматчилари учун ўқув дастурлари муҳокамаси бўйича давра суҳбати 

Жорий йилнинг 29 октябрь куни Ўзбекистон Республикаси Президенти ҳузуридаги Давлат бошқаруви академиясида «Ёшлар Фарғона водийсида ижтимоий уйғунлик учун» лойиҳаси доирасида давлат хизматчилари учун ўқув дастурларини ишлаб чиқиш ва амалга ошириш натижалари бўйича давра суҳбати бўлиб ўтди.

Тадбирда БМТ Тараққиёт дастурининг Ўзбекистондаги доимий вакили ўринбосари Дойна Мунтяну, Давлат бошқаруви академиясининг илмий ишлар ва халқаро алоқалар бўйича проректори Боту Алимов ва Бош прокуратура Академияси бошлиғи Евгений Коленко кириш сўзлари билан чиқиш қилишди.

Давра суҳбати ишида ҳар иккала Академия вакиллари давлат хизматчиларини турли масалалар юзасидан ўқитиш бўйича ўқув дастурларини намойиш қилишди.

Хусусан, Бош прокуратура Академияси томонидан «Ёшлар Фарғона водийсида ижтимоий уйғунлик учун» лойиҳаси доирасида давлат хизматчиларини коррупцияга қарши курашиш ва ҳуқуқбузарликлар профилактикаси масалалари бўйича масофавий ўқув дастури ишлаб чиқилган.

Ўқув курси манфаатлар тўқнашувини олдини олиш, давлат органларида коррупцияга қарши курашиш комплаенс тизимини жорий этиш, коррупцияга оид ҳуқуқбузарликларни аниқлаш, коррупция учун жавобгарлик, давлат органлари ва фуқаролик жамияти институтларининг коррупцияни олдини олишдаги ҳамкорлиги ҳамда оилавий зўравонликка қарши курашиш ва ёшлар ўртасида ҳуқуқбузарликлар профилактикаси масалаларини ўзи ичига олган.

Лойиҳага кўра, ўқув курси дастлаб Фарғона водийсидаги ёш хизматчилар ўртасида апробациядан ўтказилади, сўнгра мамлакатнинг барча ҳудудларида жорий этилади.