Халқаро академик  алмашинув доирасида хорижий экспертнинг Академиядаги фаолияти якунига етди

Бош прокуратура Академияси томонидан етакчи халқаро ва хорижий илмий-тадқиқот муассасалари билан ҳамкорликни ривожлантириш ва мустаҳкамлаш, шу жумладан академик алмашинув ва қўшма тадқиқотларни амалга ошириш бўйича тизимли чоралар кўрилмоқда.

Академияда Лунд университетининг (Швеция) томонидан мувофиқлаштирилувчи “Марказий Oсиё ҳуқуқи: Марказий Oсиёда ҳуқуқий маданият ва ишбилармонлик муҳити” қўшма лойиҳаси амалга оширилмоқда. Мазкур лойиҳа Латвия университети, Мармара университети (Туркия), Хельсинки  университети, Дублин университети, Марказий ва Шарқий Европа ҳамда МДҲ давлатларининг бошқа илмий-таълим муассасалари иштирокида амалга оширилмоқда.

Юқорида қайд этилган лойиҳа ҳамда Европа комиссиясининг Marie Sklodowska-Curie Research and Innovation Staff Exchange гранти доирасида 2021 йилнинг июнь-октябрь ойлари давомида Академияда Латвия университети доценти, юридик фанлари доктори Инесса Калнинанинг академик стажировкаси ташкил этилди.

И.Калнина академик стажировка давомида халқаро бизнес ҳуқуқи соҳасида тадқиқот олиб борди. Шунингдек, Академия тингловичлари учун иқтисодий ривожланишнинг ҳуқуқий асослари, экспорт фаолиятининг доираси, хавфлар ва уларни бартараф этиш усуллари бўйича ўқув машғулотлари ўтказилди.

Ўзининг Академиядаги фаолиятини якунлар экан, И.Калнинани Академияда фаолият юритган даврида жуда катта илмий ва амалий тажриба орттирган бўлиб, бу унинг келгусидаги фаолиятида муҳим аҳамият касб этишини таъкидлади ҳамда Академияга ўз олдига қўйилган вазифаларни бажаришда улкан муваффақиятлар тилади. 

Академиянинг қўшма илмий тадқиқотлар ўтказиш, ўқув жараёнига хорижий мутахассисларни жалб қилиш, илмий ходимларнинг стажировкаларини тизимли равишда ташкил этиш соҳасида халқаро ҳамкорликни амалга ошириш фаолияти мунтазам давом эттирилади.