Мураккаб (комплекс) активларни бошқариш бўйича халқаро ўқув тренинги ўтказилди

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) Котибияти вазифасини амалга ошириш доирасида БМТнинг Гиёҳвандлик ва жиноятчилик бўйича бошқармаси билан ҳамкорликда мазкур тармоқ аъзо давлатлари вакиллари учун уч кунлик “Мураккаб (комплекс) активларни бошқариш” мавзусида ўқув тренингини ташкиллаштирди.

Мазкур тренинг онлайн шаклда, тармоққа аъзо ҳамда кузатувчи бўлган – Афғонистон, Грузия, Озарбайжон, Покистон, Тожикистон, Туркманистон, Украина, Ўзбекистон, Қозоғистон, Қирғизистон ва Эрон давлатларининг ноқонуний активларни қайтариш ва бошқаришга масъул бўлган ваколатли давлат органларининг 40 га яқин вакиллари иштирокида ўтказилди.

АҚШ ва Буюк Британия давлатларидан бўлган хорижий экспертлар тренинг иштирокчилари билан бошқариш қийин бўлган, комплекс активлар – криптовалюта, кўчмас мулк, компанияларни бошқариш борасидаги ўзларининг ижобий тажрибаси ва илғор амалиёти билан бўлишишди.

Шунингдек, виртуал гуруҳларга бўлинган ҳолда ҳамкорликда вазифаларни бажаришлари, тренинг иштирокчиларига ноқонуний комплекс активларни бошқариш соҳасидаги қонунчилик ва уни амалиётда қўллаш бўйича ўзларининг тажрибаси билан алмашишларига, ушбу соҳадаги ёндашувлар ва тенденциялар билан танишишларига имконият яратди.