Академик доиралар иштирокида қонун лойиҳасини муҳокама қилиш бўйича давра суҳбати ўтказилди

Бош прокуратура Академиясида коррупцияга оид жиноятлар учун жавобгарлик муқаррарлигини таъминлашга қаратилган қонун лойиҳасининг муҳокамаси бўйича давра суҳбати бўлиб ўтди.

Хусусан, Ўзбекистон Республикаси Президентининг «Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида»ги Фармони билан тасдиқланган Коррупцияга қарши курашиш бўйича 2021–2022 йилларга мўлжалланган Давлат дастурида коррупцияга қарши қонунчиликни халқаро стандартларга мувофиқлаштириш белгиланган.

Шу муносабат билан, Академия томонидан Бош прокуратура ва бошқа идоралар билан биргаликда қайд этилган қонун лойиҳаси ишлаб чиқилиб, Олий Мажлис Қонунчилик палатасига кўриб чиқиш учун киритилган.

Қонун лойиҳасининг муҳокамасида Тошкент давлат юридик университети, Жаҳон иқтисодиёти ва дипломатия университети, Судьялар олий кенгаши ҳузуридаги Судьялар олий мактаби, ИИВ Академияси, Жамоат хавфсизлиги университети вакиллари ва лойиҳани ишлаб чиқишда бевосита иштирок этган Бош прокуратура ходимлари, шунингдек Академия магистратурасининг «Коррупцияга қарши курашиш» йўналиши тингловчилари иштирок этишди.

Тадбир давомида экспертлар томонидан тегишли таклиф ва мулоҳазалар билдирилди.

Коррупцияга қарши жиноий қонунчиликни янада такомиллаштириш мақсадида тақдим этилган таклифлар қонун лойиҳасини қайта кўриб чиқишда инобатга олинади.