Қўшма илмий тадқиқотлар ўтказиш соҳасида халқаро ҳамкорлик кенгаймоқда

Қўшма илмий тадқиқотлар ўтказиш, илмий ходимлар ва тингловчиларнинг стажировкаларини тизимли равишда ташкил этиш борасида халқаро ҳамкорликни амалга ошириш Бош прокуратура Академияси фаолиятининг устувор йўналишларидан биридир.

Мазкур вазифани самарали амалга ошириш мақсадида Академия томонидан хорижий таълим ва илмий муассасалар билан бир қатор меморандум ва келишувлар имзоланиб, ўзаро манфаатли ҳамкорлик алоқалари ўрнатилди ва ривожлантириб келинмоқда.

Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар Академияси билан таълим ва илмий-тадқиқот фаолияти соҳасида ҳамкорлик тўғрисидаги меморандумни (2017 й.) амалга ошириш доирасида ушбу муассасанинг 10 нафар докторантлари Бош прокуратура Академиясига илмий стажировка ўташ учун ташриф буюрди.

Амалиётни самарали ташкил этиш мақсадида докторантлар Академиянинг тегишли кафедраларига бириктирилиб, илмий салоҳият ва катта амалий тажрибага эга устозлар иштирокида улар учун диссертациялар доирасидаги фаолиятини давом эттириш, илмий кутубхонадан фойдаланиш ва илмий мақолалар нашр эттириш, норматив-ҳуқуқий, услубий ва таҳлилий тусдаги маълумотлар алмашиш учун зарур шароитлар яратилди.

Илмий стажировка дастурида докторантларнинг Академиянинг ўқув ва илмий жараёнларида иштирок этиши, ҳуқуқшунослик ва ҳуқуқни муҳофаза қилиш фаолиятининг долзарб масалаларини муҳокама қилишга оид илмий-амалий семинарлар, давра суҳбатлари ўтказиш ҳам назарда тутилган.

Академик алмашинув бўйича бундай тадбирларнинг амалга оширилиши муассасаларнинг илмий салоҳиятини ривожлантириш, қўшма илмий-тадқиқларни ҳамда томонларнинг ўзаро ҳамкорлигини кенгайтириш ва мустаҳкамлашга хизмат қилади.