Академик ҳамжамият ва фуқаролик жамияти институтларининг коррупцияга қарши курашиш борасидаги ҳамкорлиги бўйича давра суҳбати бўлиб ўтди

2021 йил 17 ноябрь куни Бош прокуратура Академиясида Ўзбекистон Республикаси Коррупцияга қарши курашиш агентлиги, “Юксалиш” умуммиллий ҳаракати, “Тараққиёт стратегияси” маркази билан ҳамкорликда, БМТнинг Гиёҳвандлик ва жиноятчилик бўйича бошқармаси, Европа тикланиш ва тараққиёт банки ваколатхонаси кўмагида ташкил этилган “Коррупцияга қарши курашиш борасида амалий тадқиқотларнинг сифати ва натижадорлигини ошириш: фуқаролик жамияти институтларининг роли” мавзусида давра суҳбати бўлиб ўтди.

Тадбирда БМТнинг Гиёҳвандлик ва жиноятчилик бўйича бошқармасининг Марказий Осиёдаги ваколатхонаси, Европа тикланиш ва тараққиёт банки ваколатхонаси, маҳаллий академик доиралар, фуқаролик жамияти институтлари вакиллари, Бош прокуратура Академиясининг ходимлари, илмий изланувчилари ҳамда магистратура тингловчилари иштирок этишди.

Давра суҳбати аралаш форматда ташкил этилиб, ҳудудларда фаолият юритаётган нодавлат нотижорат ташкилотлари (ННТ), илмий ва таълим муассасалари вакилларининг тадбирда видеоконференцалоқа орқали онлайн иштирок этишига имконият яратилди.

Тадбирда ННТлар томонидан академик доиралар вакиллари, соҳа экспертлари билан ҳамкорликда коррупцияга қарши курашишга оид масалалар бўйича ўтказилган тадқиқотларнинг дастлабки натижалари муҳокама қилиниб, шу билан бирга, мазкур йўналишдаги ҳамкорликни келгусида ривожлантириш масалалари, тадқиқотлар ўтказиш учун долзарб бўлган мавзулар муҳокама қилиб олинди.

Фаол муҳокамалар жараёнида фуқаролик жамияти институтлари ва академик ҳамжамият ўртасида коррупцияга қарши курашиш, турли соҳаларда мавжуд ҳолатни таҳлил қилиш, социологик тадқиқотлар ўтказиш, коррупциявий хавфларни аниқлаш, тадқиқотчи мутахассислар тайёрлаш тизимини келгусида ривожлантириш бўйича таклифлар илгари сурилди.

Давра суҳбатида сўзга чиққан экспертлар томонидан ННТлар ва академик ҳамжамиятнинг бундай ҳамкорлиги коррупцияга қарши курашиш соҳасидаги амалий тадқиқотларни ўтказишда замонавий методика, илмий тамойил ва ёндашувларни қўллаш, тадқиқот доирасида илмий асосланган хулосалар ҳамда самарали таклиф ва тавсиялар ишлаб чиқилишини таъминлашга хизмат қилишини алоҳида таъкидлаб ўтилди.