Академиянинг “Марказий Осиё ҳуқуқи: Марказий Осиёда ҳуқуқий маданиятлар ва бизнес муҳити” лойиҳаси доирасидаги тадқиқоти

Бош прокуратура Академиясининг бир гуруҳ ходимлари Швециянинг Лунд университети Ҳуқуқ социологияси департаменти билан имзоланган ўзаро англашув ҳақидаги меморандум доирасида “Марказий Осиё ҳуқуқи: Марказий Осиёда ҳуқуқий маданиятлар ва бизнес муҳити” лойиҳасида иштирок этмоқда.

Лойиҳа ҳамкорлари бўлган олий таълим муассасалари ва институтларининг тадқиқотчилари “Марказий Осиёда ҳуқуқий маданиятларни англаш” мавзусидаги халқаро илмий-амалий конференцияда иштирок этдилар.

Тадбирда Европа ва Марказий Осиёнинг бир қатор ўқув-илмий муассасалари вакиллари ўз тадқиқот йўналишлари доирасида тайёрлаган тақдимотларини намойиш этишди. Шу жумладан, Академия бошлиғи ўринбосари У.Нигмаджанов “Коррупция учун юридик шахсларнинг жиноий жавобгарлиги” мавзусида, кафедра бошлиғи М.Дўстқориев “Ўзбекистонда фуқаролар ҳуқуқий онги ва ҳуқуқий маданияти”, кафедра доценти Н.Азизов “Тадбиркорлик соҳасида юзага келувчи иқтисодий низоларни ҳал қилиш” мавзуларидаги тадқиқот концепцияларининг тақдимотини ўтказдилар.

Конференция иштирокчилари Марказий Осиёда ҳуқуқий маданиятларнинг шаклланиши ўзига хос тарихга эга бўлиб, бу соҳада фундаментал илмий тадқиқотлар олиб бориш ва унинг натижаларини амалиётга жорий этиш минтақада қонун устуворлигини янада мустаҳкамлаш ва қулай бизнес муҳитини яратишда муҳим ўрин тутишини таъкидладилар.

Иштирокчилар илмий тадқиқотлар амалий натижаларини жорий этиш, шунингдек лойиҳа доирасида илмий мақолалар чоп этиш ва бошқа ташкилий тадбирларни амалга ошириш юзасидан ўзаро фикр алмашдилар.