Фарғона водийси ёш давлат хизматчилари учун туркум тренинглар ўтказилди

Бош прокуратура Академияси Ўзбекистон Республикаси Коррупцияга қарши курашиш агентлиги билан ҳамкорликда БМТнинг “Фарғона водийси ёшларининг ижтимоий уйғунлиги” қўшма дастури доирасида жорий йилнинг 15-20 ноябрь кунлари Андижон, Наманган ва Фарғона вилоятлари ёш давлат хизматчилари учун “Коррупцияга қарши курашиш ва ёшлар ўртасида ҳуқуқбузарликларнинг олдини олиш” мавзусида туркум тренинглар ўтказилди.

Тренингларда 26 давлат органининг 300 нафардан зиёд ходимлари жалб этилди.

Иштирокчилар тренинглар доирасида давлат хизматида манфаатлар тўқнашувининг олдини олиш ва коррупцияга қарши курашиш этикаси, давлат органлари ва ташкилотларида коррупцияга қарши ички назорат (комплаенс) тузилмалари фаолиятини самарали ташкил этиш, коррупциянинг олдини олишда давлат органлари ва фуқаролик жамияти институтларининг ҳамкорлиги масалаларини атрофлича кўриб чиқишди.

 Ёш давлат хизматчилари тажрибали тренерлар бошчилигида маҳаллий ва идоравий даражада коррупциянинг олдини олишда ёшларни ижтимоий сафарбар қилиш, ёшлар орасида ҳалолликни ва коррупция кўринишларига нисбатан муросасиз муносабатни мустаҳкамлаш, мансабдор шахсларнинг коррупцияга оид ҳуқуқбузарликларини аниқлаш, коррупцияга оид ҳуқуқбузарликлар учун жавобгарлик, ёшлар ўртасида ҳуқуқбузарликлар содир этилишининг олдини олиш ҳамда оилавий-маиший зўравонликка қарши курашиш каби мавзуларни интерфаол машғулотлар жараёнида муҳокама қилдилар.

Иштирокчилар томонидан мазкур тренинг коррупцияга қарши курашиш ва ҳуқуқбузарликлар профилактикасига оид билим ва амалий кўникмаларини кучайтиришда, келгусида ўз иш фаолиятларини янада такомиллаштиришда муҳим аҳамият касб этиши таъкидланди.