Ўзбекистон Республикаси раислигида ARIN-WCA тармоғининг Йиллик умумий йиғилиши ўтказилди

Бош прокуратура Академиясида Ўзбекистон Республикаси раислигида Ғарбий ва Марказий Осиё давлатларининг активларни қайтариш бўйича норасмий идоралараро тармоғига (ARIN-WCA) аъзо давлатларнинг Йиллик умумий йиғилиши бўлиб ўтди.

Тадбир аралаш (онлайн ва анъанавий) шаклда ўтказилиб, унда 15 га яқин давлатдан 30 дан ортиқ вакил иштирок этди.

Хусусан, йиғилишда иштирок этиш учун Грузия, Озарбайжон, Монголия, Покистон, Қирғизистон, Қозоғистон, Украина давлатларининг прокуратура, ички ишлар, молиявий разведка, коррупцияга қарши курашиш ва тергов идораларининг масъул ходимлари ҳамда БМТнинг Гиёҳвандлик ва жиноятчилик бўйича бошқармаси экспертлари Ўзбекистонга ташриф буюрди.

Йиғилишда ARIN-WCA тармоғига аъзо давлатларнинг жиноий активларни қайтариш соҳасида амалга оширган ишлари, ижобий тажрибаси ва амалиёти бўйича тақдимотлари, тармоқни самарали бошқариш ва унинг доирасида ҳамкорликни кенгайтириш масалалари, келгусидаги лойиҳалар ҳамда истиқболли режаларнинг муҳокамаси бўлиб ўтди.

Тадбирни ўтказишдан асосий мақсад 2021 йилда мазкур тармоқ доирасида амалга оширилган ишларни сарҳисоб қилиш, шунингдек жиноий активларни қайтариш борасида идоралараро халқаро ҳамкорликни янада кенгайтиришдан иборат.

Маълумот учун: Ғарбий ва Марказий Осиё давлатларининг активларни қайтариш бўйича норасмий идоралараро тармоғи (ARIN-WCA) 2018 йилда ташкил топган бўлиб, унинг асосий мақсади жиноий активларни қайтаришда ҳамкорликни кучайтириш ва ушбу соҳада ҳатти-ҳаракатлар самарадорлигини оширишдан иборат.

Ўзбекистон Республикаси Бош прокуратураси ARIN-WCA тармоғининг доимий фаолият олиб борувчи Котибияти ҳисобланиб, унинг функцияларини Бош прокуратура Академияси амалга ошириб келмоқда.

Бугунги кунда ARIN-WCAга Афғонистон, Грузия, Озарбайжон, Покистон, Тожикистон, Туркманистон, Украина, Ўзбекистон, Қозоғистон, Қирғизистон ва Эрон, жами 11 та давлат аъзо ва кузатувчи сифатида қўшилган. Жумладан, UNODC ҳамда CARIN, ARIN-AP ва ARINSA тармоқлари ARIN-WCAда кузатувчи ҳисобланади.