“Жиноят ва жиноят – процессуал қонунчилигини такомиллаштиришнинг айрим масалалари” мавзусида халқаро илмий-амалий конференция бўлиб ўтди

Ўзбекистон Республикаси Бош прокуратураси Академиясида “Жиноят ва жиноят – процессуал қонунчилигини такомиллаштиришнинг айрим масалалари” мавзусида халқаро илмий-амалий конференция бўлиб ўтди.

Қўшма илмий тадқиқотлар соҳасида халқаро ҳамкорликни самарали амалга ошириш мақсадида Қозоғистон Республикаси Ҳуқуқни муҳофаза қилувчи органлар Академияси, Ўзбекистон Республикаси Бош прокуратураси Академияси ўқитувчилари ва докторантлари, шунингдек, Тошкент давлат юридик университети ўқитувчилари конференцияда иштирок этдилар.

Анжуманда вояга етмаганларнинг жинсий дахлсизлигига қарши жиноятларни тергов қилишда криминалистик алгоритмларнинг асосий йўналишларини жорий этиш, хорижий мамлакатларда солиқ соҳасидаги ҳуқуқбузарликлар учун маъмурий жавобгарликни ҳуқуқий тартибга солиш масалалари, алимент ундиришда вояга этмаганларнинг ҳуқуқларини ҳимоя қилиш ва бошқа масалалар муҳокама қилинди.

Тадбир конструктив муҳокама руҳида ташкил этилиб, иштирокчилар ўзларини қизиқтирган саволларга жавоб олдилар.