Илмий тадқиқотлар методологияси соҳасида салоҳият оширилмоқда

Илмий тадқиқотлар методологияси соҳасида салоҳиятни ошириш мақсадида Тошкент халқаро Вестминстер университети профессори Т.Тагиева иштирокида магистратура тингловчилари ва докторантлар учун илмий тадқиқотлар методологияси бўйича ўқув курси йўлга қўйилди.

Мазкур дастур тингловчиларга фанлараро таълим олиш, ўз касбий маҳоратларини ошириш ҳамда уларга манфаатли бўлган асосий соҳаларни ўрганишда ҳуқуқий, ижтимоий, иқтисодий тадқиқотлардаги тажрибаларни татбиқ қилиш бўйича кенг имкониятларни тақдим этади.

Курс ҳуқуқий тадқиқотлар тамойиллари ва методологияси, тадқиқот бўйича илмий нашрнинг таркибий қисмлари, лойиҳа дизайни, ҳуқуқий тадқиқотларда назариянинг роли бўйича билимларни ривожлантиришга йўналтирилган.

Курс дастуридан тингловчиларни доктринал, эмпирик, қиёсий каби ҳуқуқий тадқиқотга бўлган турли ёндашув ва усуллар билан таништиришга бағишланган махсус сессия ҳам ўрин олган.

Курсни ўзлаштириш билан бир вақтда, тингловчилар олинган билим ва кўникмаларини услубий жиҳатдан асослантирилган, ўзига хос ҳамда инновацион тадқиқот лойиҳаларини ишлаб чиқишда қўллаш учун муайян ҳуқуқ соҳаларининг мутахассислари ҳисобланган мураббийлар билан яқиндан ҳамкорликни йўлга қўйишлари лозим бўлади.