Коррупцияга қарши курашувчи органлар вакиллари учун халқаро тренинг ташкил этилди

Бош прокуратура Академияси томонидан Иқтисодий ҳамкорлик ва тараққиёт ташкилоти кўмагида ИҲТТнинг Ўзбекистон учун коррупцияга қарши курашиш лойиҳаси доирасида “Коррупцияга оид жиноятларни тергов қилиш” мавзусидаги ўқув курси ишлаб чиқилди ва амалга оширилди.

Ўқув курси масофавий ва анъанавий шаклдаги “Коррупция учун жиноий жавобгарлик” ва “Коррупцияга оид жиноятларини аниқлаш ва тергов қилиш” каби иккита ўқув модулларини ўз ичига олди.

Ўқув курсининг масофавий қисмида прокуратура органлари, Давлат хавфсизлик хизмати ва Коррупцияга қарши курашиш агентлигининг коррупциявий схемаларни фош қилиш ва тергов қилишга масъул бўлган терговчилари ва ходимлари коррупцияга оид жиноятларни аниқлаш ва тергов қилиш, жиноий активларни қидириш, хатлаш ва мусодара қилиш, идоралараро ва халқаро ҳамкорлик воситаларидан фойдаланиш каби назарий масалалар билан танишиб чиқишди.

2021 йилнинг 29 ноябрдан 3 декабрга қадар Бош прокуратура Академиясида ИҲТТнинг Коррупцияга қарши курашиш тармоғи экспертлари ва миллий тренерлар иштирокида курснинг тренинг қисми ташкил этилиб, унда иштирокчилар гуруҳларга бўлинган ҳолда коррупция билан боғлиқ гипотетик жиноят иши бўйича тергов ҳаракатларини ўтказишди.

Амалий топшириқларни бажариш, амалиётда юзага келадиган муаммоларни муҳокама қилиш ва ҳал қилиш, симуляциявий иш бўйича оралиқ ва якуний қарорларнинг тақдимотини ўтказиш иштирокчиларнинг тегишли амалий кўникмаларини яхшилашга имкон берди.

Ўқув тадбири якунида тест синовларидан мувоффақиятли ўтган иштирокчиларга сертификатлар топширилди.