Инновацион лойиҳага старт берилди

Бош прокуратура Академияси томонидан “Аҳоли миграциясида рақамли визалар платформасини ишлаб чиқиш” инновацион лойиҳага старт берилди.

10 сентябрь куни Бош прокурор ўринбосари Э.Т.Юлдашев, Ўзбекистон Республикаси Олий Мажлиси Қонунчилик палатаси депутатлари, Вазирлар Маҳкамаси, Инсон ҳуқуқлари бўйича миллий марказ, Давлат хавфсизлик хизмати, Ички ишлар вазирлиги, Ташқи ишлар вазирлиги, Адлия вазирлиги, Бандлик ва меҳнат муносабатлари вазирлиги, Иқтисодий тараққиёт ва камбағалликни қисқартириш вазирлиги, Ахборот технологиялари ва коммуникацияларини ривожлантириш вазирлигининг вакиллари иштирокида онлайн режимда ишчи гуруҳ йиғилиши бўлиб ўтди.

Мазкур лойиҳани сифатли ва ўз вақтида амалга ошириш мақсадида идоралараро таҳлилий ишчи гуруҳ шакллантирилди ва Ўзбекистон Республикасининг Миграция кодекси, миграция соҳасидаги давлат сиёсати концепцияси лойиҳаларини ишлаб чиқиш ҳамда “Musofir” номли рақамли визалар платформасини яратиш вазифаси белгиланди.

Лойиҳани амалга ошириш натижасида меҳнаткаш-мигрантлар ва улар оила аъзоларининг ҳуқуқларини ҳимоя қилишга қаратилган халқаро стандартлар ва хорижий давлатларнинг илғор тажрибалари ўрганилиши, миграция соҳасидаги ваколатли давлат органлари учун малакали кадрлар тайёрлаш тизимини йўлга қўйишда “Миграция ҳуқуқи” фанини алоҳида ҳуқуқ соҳаси сифатида ўқитиш мақсадида дарслик тайёрланиши қайд этилди.

Онлайн учрашув чоғида ишлаб чиқиладиган норматив-ҳуқуқий ҳужжатлар лойиҳаларининг тузилиши ва концепцияси, шунингдек “Мусофир” номли рақамли визалар платформасининг техник хусусиятлари батафсил муҳокама қилинди.