Академия мутахассислари сув тошқинидан талофат кўрган аҳолига психологик кўмак беришда иштирок этмоқда

Ўзбекистон Республикаси Бош прокуратураси Академияси психологик таъминлаш бўлими мутахассислари Сардоба сув омборидаги фавқулодда вазият натижасида содир бўлган сув тошқинидан талофат кўрган Сирдарё вилояти аҳолисига психологик кўмак беришда иштирок этмоқда.

Ҳодисанинг биринчи кунлариданоқ Академия мутахассислари М.В.Ломоносов номидаги Москва давлат университетининг Тошкент шаҳридаги филиали психологлари билан биргаликда эвакуация қилинган фуқаролар билан вақтинчалик истиқомат қилиб келаётган турар жойларда уларнинг оптимал психологик ва психофизиологик ҳолатини сақлаб туриш мақсадида фаолият олиб бормоқдалар.

Мутахассислар томонидан ҳодиса оқибатида аҳолининг юқори даражадаги ҳис-ҳаяжон ва стресс таъсиридан халос бўлиши, вақтинчалик истиқомат қилиш жойларига мослашишларига кўмаклашиш мақсадида индивидуал ва оилавий консультациялар ўтказилмоқда.

Шунингдек, фаолият кўрсатаётган штаб томонидан фавқулодда вазиятни бартараф этиш бўйича самарали чораларни ишлаб чиқишида фойдаланиш мақсадида, эвакуация қилинган фуқаролар билан сўров ва суҳбатлар ўтказилиб, сув тошқини оқибатида жабр кўрган инсоннинг ижтимоий портрети яратилмоқда.