БМТ Коррупцияга қарши конвенциясининг конференцияси модели ташкил этилди

Халқаро коррупцияга қарши курашиш куни муносабати билан ўтказилаётган ҳафталик доирасида 2021 йилнинг 24 декабрь куни Бош прокуратура Академияси томонидан Коррупцияга қарши курашиш агентлиги, БМТнинг Гиёҳванд моддалар ва жиноятчиликка қарши курашиш бошқармаси ва “Минтақавий мулоқот” ХННТ билан ҳамкорликда БМТ Коррупцияга қарши конвенцияси иштирокчи-давлатлари конференцияси модели: “БМТ Коррупцияга қарши конвенциясини амалга ошириш механизми: иккинчи босқич обзори”нинг якуний босқичи ташкил этилди.

Маълумот учун, тадбирнинг биринчи босқичи жорий йилнинг 9 декабрь куни Бош прокуратура Академиясида ўтказилиб, унда Модел Конференциясига старт берилган.

Тадбирнинг якуний босқичида Тошкент шаҳридаги Халқаро Вестминстер университети, Наманган давлат университети, Тошкент давлат юридик университети, Жаҳон иқтисодиёти ва дипломатия университети, Судьялар олий кенгаши ҳузуридаги Судьялар олий мактаби, Бош прокуратура Академиясининг магистратура тингловчилари ролли ўйинлар шаклида Конвенцияси иштирокчи-давлатлари (Армения, Германия, Жанубий Африка Республикаси, Словения, Франция ва Ўзбекистон) делегатлари сифатида чиқиш қилишди.

Конференция давомида шартли делегатлар ўзларининг давлатларида Конвенциянинг 8-моддаси (Оммавий мансабдор шахсларнинг одоб-ахлоқ кодекслари) қоидаларининг имплементация қилиниши бўйича ҳисоботларни тақдим қилишди, бошқа делегацияларнинг саволларига жавоб бериш орқали дебатларда қатнашишди, шунингдек муҳокама қилинаётган масалалар бўйича таҳлилий солиштириш асосида Ўзбекистон қонунчилигини такомиллаштиришга қаратилган таклифлар юзасидан тақдимот ўтказишди.

Делегацияларнинг чиқишлари БМТ ГЖБ Марказий Осиёдаги минтақавий ваколатхонаси, “Минтақавий мулоқот” ХННТ, Коррупцияга қарши курашиш агентлиги ва “Ўзбекистонда очиқлик ва шаффофлик” таҳлилий маркази ННТнинг халқаро и миллий даражадаги экспертлари томонидан баҳолаб борилди.

Ташкил этилган тадбир иштирокчиларнинг БМТнинг Коррупцияга қарши конвенцияси қоидалари бўйича билимларини оширишга, Конвенция бўйича обзор механизмларини ўтказишга ҳамда хорижий мамлакатлар ва Ўзбекистондаги оммавий мансабдор шахсларнинг одоб-ахлоқ кодекслари билан яқиндан танишишга имконият берди.