Капитал қурилиш соҳасига оид қонунчилик ижроси бўйича ўқув курси

Бош прокуратура Академиясида 2021 йилнинг 22-29 декабрь кунлари “Капитал қурилиш соҳасига оид қонунчилик ижроси устидан назорат” мавзусида қисқа муддатли ўқув курси ўтказилди.

Курс видеоконференцалоқа имкониятларидан фойдаланган ҳолда синхрон таълим шаклида ташкил этилди. Унда Ўзбекистон Республикаси Президентининг 2021 йил 10 декабрдаги “Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури ҳамда бошқа давлат дастурлари ижроси устидан назоратни кучайтиришга доир қўшимча чора-тадбирлар тўғрисида”ги ПҚ–43-сон қарорига кўра ташкил этилган давлат дастурлари ижро этилишини назорат қилиш ва мувофиқлаштириш бўйича штабларга жалб этилаётган вазирлик ва идораларнинг 500 нафар ходими иштирок этди.

Машғулотлар давомида шаҳарсозлик ҳужжатларини ишлаб чиқиш ва тасдиқлашни ташкил қилиш, уларнинг амалга оширилиши устидан мониторинг олиб бориш, ижтимоий ва ишлаб чиқариш инфратузилмасини ривожлантириш дастурларини ишлаб чиқиш, қурилиш лойиҳа-смета ҳужжатларини ишлаб чиқиш ва экспертизадан ўтказиш, қурилиш лойиҳалари бўйича танлов (тендер) ўтказиш, бажарилган қурилиш ишларини назорат ўлчовдан ўтказиш ҳамда бошқа бир қатор долзарб масалалар муҳокама қилинди.

Тингловчилар қурилиш обектларини молиялаштиришнинг муҳим жиҳатлари, қурилишга ажратилаётган бюджет ва бюджетдан ташқари маблағларнинг мақсадли сарфланиши устидан назоратни амалга ошириш, бу борадаги қонун ҳужжатлари ижроси устидан прокурор назоратини ташкил этиш ҳамда бир қатор бошқа масалаларни муҳокама қилиш имконига эга бўлди.

Мазкур ўқув курси штаб аъзоларининг Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури ва бошқа давлат дастурлари ижросини ўз вақтида, тўлиқ ва сифатли бажарилишини назорат қилиш ва мувофиқлаштириш бўйича зарур кўникма ва билимларни шакллантиришга қаратилган.

Дарслар ўқитишнинг интерфаол технологияларидан фойдаланган ҳолда олиб борилди, тингловчилар томонидан амалиётда учраётган муҳим масалалар муҳокама қилинди. Шунингдек, тингловчиларга мазкур саволлар юзасидан соҳа мутахассислари томонидан атрофлича жавоблар берилди.

Курс ўқув дастурини ўзлаштириш натижаларига кўра тингловчиларга сертификатлар топширилди.