Прокуратура органларининг кадрлар тармоқлари ходимлари учун ўқув курси якунланди

Бош прокуратура Академияси томонидан прокуратура органларининг  кадрлар хизмати ходимлари учун “Прокуратура органларида кадрларни танлаш, тайинлаш ва тарбиялашнинг айрим масалалари” мавзусида ўқув курси ташкил этилди.

Ўқув курси дастурида прокуратура органларида кадрлар ишини самарали ташкил этиш, жумладан кадрлар захирасини шакллантириш, ишга қабул қилишни шаффофлик тамойили асосида амалга ошириш, номзодларнинг шахсий хусусиятлари ва касбий фазилатларини аниқлашнинг замонавий усулларини жорий этиш, янги ишга қабул қилинган ходимларни касбий фаолиятга мослаштириш, ходимларнинг мотивациясини ошириш ва уларнинг фаолияти самарадорлигини баҳолашнинг оптимал методларини қўллаш каби масалалар киритилган.

Ўқув курси доирасида прокуратура органларининг кадрлар хизмати фахрийлари ва Ўзбекистон Республикаси Президенти ҳузуридаги Давлат хизматларини ривожлантириш агентлиги фаолияти тажрибасини ўрганиш, шунингдек судьяларни танлаш, тайинлаш, малакасини ошириш ва баҳолаш жараёнлари билан яқиндан таништиришга қаратилган қатор тадбирлар ташкил этилди.

Курс иштирокчилари Ўзбекистон Республикаси прокуратураси музейига ташриф буюриб, прокуратура органлари фаолиятининг шаклланиши ва ривожланиши билан боғлиқ тарихий жараёнлар билан танишдилар.