Германия Федератив Республикаси Шимолий Рейн-Вестфалия Федерал ўлкаси Адлия вазирлиги,Бош прокуратураси ва Германия халқаро ҳуқуқий ҳамкорлик жамғармаси (IRZ) вакилларининг Бош прокуратура Академиясига ташрифи

Бош прокуратура Aкадемиясида Шимолий Рейн-Вестфалия Федерал ўлкаси Адлия вазирлиги котиби Дирк Ведель бошчилигидаги Адлия вазирлиги ва Бош прокуратураси, ҳамда Германия халқаро ҳуқуқий ҳамкорлик жамғармаси (IRZ) вакилларидан иборат делегация билан учрашув бўлиб ўтди.

Делегация аъзолари Академия тузилмаси ва фаолияти, кадрларни тайёрлаш, қайта тайёрлаш ва малакасини ошириш тизими билан яқиндан танишди. Шунингдек, Академия IRZ фонди билан ҳамкорлиги ҳақида маълумот берди. Академияни шакллантиришда, жумладан, Ўзбекистон Республикаси прокуратураси ходимларини тайёрлаш
ва малакасини ошириш борасида Германия халқаро ҳуқуқий ҳамкорлик жамғармаси тажрибасидан фойдаланилгани таъкидланди.

Учрашувда томонлар коррупцияга қарши курашиш масалаларига алоҳида эътибор қаратдилар. Меҳмонларга Академиянинг мазкур йўналишдаги фаолияти, Коррупцияга қарши курашиш илмий-таълим маркази ташкил этилгани ҳамда Академиянинг шу номдаги магистратура йўналишининг йўлга қўйилгани ҳақида маълумот берилди.

Учрашув дўстона руҳда ўтди ва бўлиб ўтган конструктив мулоқотдан ўзаро мамнунлик изҳори билан якунланди.