“Адолат” миллий ҳуқуқий ахборот маркази билан ҳамкорлик тўғрисида Меморандум имзоланди

2022 йил 11 мартда Ўзбекистон Республикаси Бош прокуратураси Академияси ҳамда Ўзбекистон Республикаси Адлия вазирлиги қошидаги “Адолат” миллий ҳуқуқий ахборот маркази ўртасида ўзаро ҳамкорлик тўғрисида меморандум имзоланди.

Ушбу ташаббус доирасида аҳолининг ҳуқуқий маданиятини юксалтиришга доир ишлар самарадорлигини ошириш бўйича келишувга эришилди.

Хусусан, аҳолининг, айниқса, ёшларнинг ҳуқуқий онги ва ҳуқуқий маданиятини ошириш бўйича манзилли ва предметли ҳуқуқий тарғибот тадбирларини биргаликда ўтказиш, шунингдек, қонунчилик ҳужжатларининг моҳиятини ҳамда мамлакатда амалга оширилаётган ислоҳотларнинг аҳамиятини кенг ёритишга доир тарғибот ва медиа материалларни биргаликда ишлаб чиқиш ва тарқатиш каби ҳамкорлик шакллари назарда тутилган.

Томонлар ўртасида бўлиб ўтган конструктив мулоқотда ҳамкорлик истиқболлари муҳокама қилиниб, ўзаро манфаатли йўналишлар доирасида келгуси ҳамкорлик истиқболлари ҳамда энг муҳим йўналишлари белгилаб олинди. Жумладан, Академия профессор-ўқитувчилари томонидан рақобатбардош юридик дарсликлар, кодекслар ва қонунчилик ҳужжатларига шарҳлар ҳамда турли ҳуқуқий қўлланмаларни тайёрлаб, “Адолат” миллий ҳуқуқий ахборот маркази кўмагида чоп этишга келишиб олинди.

Меморандумнинг имзоланиши икки томонлама ҳамкорликнинг ривожланишига янги куч бериб, илмий тадқиқотларни янада рағбатлантиришга улкан ҳисса қўшади.

Маълумот учун: “Адолат” миллий ҳуқуқий ахборот маркази – аҳоли ва ижрочиларга жамиятда аҳолининг ҳуқуқий онги ва ҳуқуқий маданиятини юксалтиришга қаратилган ҳуқуқий ахборотларни ҳамда тарғибот материалларини тайёрлаш ва тезкор тарқатиш, норматив-ҳуқуқий ҳужжатлар матнларини расмий эълон қилиш соҳасида республиканинг етакчи давлат муассасаси ҳисобланади. Шунингдек, қонун ҳужжатлари маълумотлари миллий базасини юритиш орқали ҳуқуқий ахборотни тарқатиш ва ундан фойдаланишни таъминлаш, Ўзбекистон Республикаси Қонун ҳужжатлари маълумотлари миллий базасини шакллантириш ва доимий равишда янгилаб бориш, норматив-ҳуқуқий ҳужжатларва тегишли ахборот-таҳлилий материалларни Ўзбекистон Республикаси Вазирлар Маҳкамаси томонидан белгиланадиган рўйхат бўйича барча давлат органлари ва ташкилотларига электрон шаклда етказилишини таъминлаш, аутсорсинг шартларида юридик адабиётлар ва расмий нашрларнинг расман чоп этилишини таъминлайди.