Трансмиллий таҳдидларга қарши кураш соҳасидаги эксперт билан учрашув бўлиб ўтди

Бош прокуратура Академиясида ЕХҲТ Трансмиллий таҳдидларга қарши курашиш департаментининг Полиция фаолиятининг стратегик масалалари бўлими эксперти Юрай Носаль билан учрашув бўлиб ўтди.

Учрашув ЕХҲТнинг “Марказий Осиёда кибержиноятчиликка қарши курашиш салоҳиятини ривожлантириш” лойиҳаси доирасида ташкил этилди. Учрашувда лойиҳанинг биринчи босқичини амалга ошириш натижалари ҳамда кейинги босқичларни амалга ошириш билан боғлиқ масалалар муҳокама қилинди.

Академия бўйлаб экскурсия давомида мутахассис Академиянинг кибержиноятчиликка қарши курашиш соҳаси кадрларини тайёрлаш борасидаги илмий ва таълим салоҳияти билан бевосита танишди, шунингдек ЕХҲТнинг Ўзбекистондаги лойиҳалари Координатори кўмагида ташкил этилган “Дарк-веб лаборатория” ихтисослаштирилган ўқув хонасига ташриф буюрди.

Томонлар шунингдек кибержиноятчиликка қарши курашиш соҳасида Академия салоҳиятини ошириш, ўқув-услубий материалларни биргаликда ишлаб чиқиш бўйича ҳамкорликнинг истиқболли йўналишларини муҳокама қилди.

Учрашув якунида Ю.Носал томонидан Академия кутубхонасига очиқ манбалар  ёрдамида рақамли далилларни излаш (OSINT Techniques) бўйича махсус адабиётлар тақдим этилди.