Академия ёш олимларининг халқаро анжумани

Бош прокуратура Академияси томонидан АҚШ Халқаро тараққиёт агентлиги (USAID) кўмагида “Юридик фан ва ҳуқуқни қўллаш амалиётининг долзарб муаммолари: одил судлов ва  юридик ёрдам имкониятлари” мавзусида халқаро илмий-амалий онлайн конференцияси ўтказилди.

Илмий тадқиқот консорциуми доирасида “Ёш олимлар минбари” рукни остида анъанавий тарзда ўтказиб келинаётган ушбу анжуман онлайн ва оффлайн шаклда ташкил этилди.

Тадбирда Ўзбекистон Республикаси Бош прокуратураси Академиясининг ходимлари, докторантлари, мустақил изланувчилари ва магистратура тингловчилари билан қаторда БМТнинг ногиронлар ҳуқуқлари бўйича махсус маърузачиси – Гарвард юридик мактабининг катта илмий ходими Ж.Лорд,  Швециянинг Лунд университети, Инсон ҳуқуқлари бўйича Ўзбекистон Республикаси миллий маркази илмий ходимлари ҳамда ИИВ Академияси, Тошкент давлат юридик университети, Судьялар олий мактаби, оммавий ахборот воситалари ва фуқаролик жамияти институтларининг вакиллари иштирок этишди.

Конференция давомида юридик илм-фанда этика қоидаларининг ўзига хос хусусиятлари, юридик ёрдамнинг ҳуқуқий асослари, нодавлат ташкилотларининг аҳолига бепул юридик ёрдам кўрсатишдаги имкониятлари, имконияти чекланган шахслар ва аёлларнинг одил судловга эришиш, маъмурий судлар томонидан норматив-ҳуқуқий ҳужжатларнинг қонунийлигини текшириш ва прокуратура органлари томонидан беғараз юридик ёрдам кўрсатиш каби бир қатор долзарб масалалар муҳокама қилинди.

Тадбир доирасида кўриб чиқилган масалалар юзасидан конструктив баҳс-мунозаралар бўлиб ўтди. Конференция якунида аҳолининг заиф қатламлари ҳуқуқларини ҳимоя қилиш механизмларини такомиллаштириш соҳаларида халқаро стандартларни имплементация қилиш, шунингдек юридик фан ва ҳуқуқни қўллаш амалиётининг долзарб муаммоларини бартараф этиш бўйича бир қатор тавсиялар ишлаб чиқилди.

Конференция якуни бўйича ҳар бир шўъба мавзуларига оид маъруза тезислари ва илмий мақолалар тўпламини чоп этиш ҳақида қарор қабул қилинди.