Хорижий эксперт иштирокида “Бола ҳуқуқлари” ўқув курси доирасида машғулотлар бўлиб ўтди

Бош прокуратура Академиясида ЮНИСЕФнинг Ўзбекистондаги ваколатхонаси билан ҳамкорликда хорижий эксперт И.Урумова иштирокида “Инсон ҳуқуқларига оид халқаро ҳуқуқ” магистратура йўналиши тингловчилари учун “Бола ҳуқуқлари” ўқув курси доирасида онлайн ўқув машғулотлари ташкил этилди.

Мазкур ўқув курс машғулотлари 7 ҳафта давомида ўтказилиб, прокуратура фаолияти ва идоралараро ҳамкорлик контекстида бола ҳуқуқларини ҳимоя қилиш ва бола учун одил судлов хусусиятларини ўргатишга  йўналтирилган.

Машғулотлар давомида бола ҳуқуқлари соҳасидаги халқаро ҳуқуқий нормаларнинг мазмун-моҳияти, бола ҳуқуқларини ҳимоя қилишнинг миллий ва халқаро тизими, вояга етмаганлар томонидан содир этилган жиноятлар ва маъмурий ҳуқуқбузарликлар учун жавобгарликнинг хусусиятлари, болалар жабрланувчи сифатида иштирок этган жиноятлар, шу жумладан болаларга нисбатан содир этилган жинсий жиноятлар, болалар меҳнатидан фойдаланиш каби ҳуқуқбузарликлар таркиби ва уларнинг олдини олишдаги айрим муаммолар ҳақида маълумот берилди.

Мазкур ўқув модули тингловчиларга бола ҳуқуқлари соҳасидаги халқаро тажриба билан танишиш, халқаро стандартларни миллий қонунчиликка имплиментация қилиш ва бу борадаги мавжуд муаммоларни комплекс таҳлил қилиш имконини беради.