Миграция ҳуқуқи соҳасидаги янги нашрлар

Бош прокуратура Академияси томонидан Инсон ҳуқуқлари бўйича Ўзбекистон Республикаси миллий маркази билан ҳамкорликда “Мамлакатимизда миграция соҳасидаги давлат бошқарувининг долзарб масалалари” мавзусидаги халқаро илмий-амалий конференция материаллари тўплами, “Миграция ҳуқуқига кириш” номли ўқув қўлланма ва “Миграция ҳуқуқи” номли дарслик нашрдан чиқди.

Ю.ф.ф.д. (PhD), доцент Л.Х.Исоқов муаллифлигида тайёрланган мазкур ўқув қўлланма ва дарсликлар Ўзбекистонда янги шаклланаётган миграция ҳуқуқига бағишланган бўлиб, унда миграция ҳуқуқи тушунчаси ва унинг миллий ҳуқуқий тизимда тутган ўрни, предмети вазифаси ва манбалари, миграция таснифи ва мигрантлар тоифалари, миграция соҳасидаги давлат бошқаруви органларининг ҳуқуқ ва ваколатлари, субъектларнинг ҳуқуқий ҳолати каби масалалар ҳақида сўз боради.

Шунингдек, ушбу ўқув қўлланма ва дарсликқа Ўзбекистон Республикаси Миграция кодекси ва Миграция соҳасидаги давлат сиёсати концепциясининг лойиҳалари, миграция жараёнларини ҳуқуқий тартибга солишга қаратилган норматив-ҳуқуқий ҳужжатлардан айрим намуналар, жумладан, БМТнинг “Барча меҳнаткаш-мигрантлар ва уларнинг оила аъзолари ҳуқуқларини ҳимоя қилиш бўйича” конвенциясининг ўзбек тилидаги илк таржимаси ҳамда “Миграция ҳуқуқи” бўйича намунавий ўқув дастури илова қилинган.

“Аҳоли миграциясида рақамли визалар платформасини ишлаб чиқиш” мавзусидаги инновацион лойиҳа доирасида чоп этилган мазкур нашрлар юридик олий таълим ва илмий-тадқиқот муассасалари профессор-ўқитувчилари ва тадқиқотчилари ҳамда юриспруденция соҳасига қизиқувчи кенг китобхонлар оммаси учун мўлжалланган.